ریاض: سعودی عرب نے پاکستان اور ترکی کے ساتھ مشترکہ دفاعی تعاون کے تحت عسکری سربراہان کا ہنگامی اجلاس طلب کر لیا ہے، جس میں سعودی عرب کی سلامتی کے لیے مشترکہ اقدامات پر غور کیا جائے گا۔

 ترک وزارتِ دفاع کے مطابق چیف آف جنرل اسٹاف جنرل سلجوق بیرقدار اوغلو اجلاس میں شرکت کے لیے سعودی عرب جائیں گے۔ اجلاس میں سعودی اور پاکستانی عسکری قیادت بھی شریک ہوگی۔

 سعودی وزارتِ خارجہ کے مطابق اجلاس میں مشترکہ دفاعی معاہدے کے تحت سعودی عرب کی حمایت کے طریقہ کار پر تبادلہ خیال کیا جائے گا۔

 ذرائع کے مطابق اجلاس کا فیصلہ نیویارک میں سعودی، پاکستانی اور ترک وزرائے خارجہ کی ملاقات کے دوران کیا گیا۔ تینوں وزرائے خارجہ نے سعودی عرب اور مکہ میں شہری و اقتصادی تنصیبات پر حالیہ حوثی حملوں کی مذمت کی۔

 ملاقات میں علاقائی کشیدگی کم کرنے، بین الاقوامی قانون اور ریاستی خودمختاری کے احترام سمیت سمندری نقل و حمل کی آزادی کو یقینی بنانے کی اہمیت پر بھی زور دیا گیا۔

واشنگٹن: چینی صدر شی جن پنگ اور امریکی صدر ڈونلڈ ٹرمپ کے درمیان ملاقات ہوئی، جس میں امریکا اور ایران کے درمیان مذاکرات سمیت اہم عالمی امور پر تبادلہ خیال کیا گیا۔

 شی جن پنگ نے امید ظاہر کی کہ امریکا اور ایران اسلام آباد مفاہمتی یادداشت کی طرف واپس آئیں گے اور ایک جامع معاہدے تک پہنچنے میں کامیاب ہوں گے۔ ان کے مطابق مجوزہ معاہدے میں جوہری معاملے سمیت دیگر امور کا حل بھی شامل ہونا چاہیے۔

 ملاقات کے بعد امریکی صدر ڈونلڈ ٹرمپ نے وائٹ ہاؤس میں چینی صدر کے اعزاز میں پروقار عشائیے کا اہتمام کیا۔ اس موقع پر دونوں رہنماؤں نے امریکا اور چین کے دیرینہ تعلقات اور باہمی ترقی کے عزم کا اعادہ کیا۔

 چینی صدر شی جن پنگ نے امریکی صدر کی میزبانی پر شکریہ ادا کرتے ہوئے کہا کہ دونوں بڑی طاقتوں کے درمیان محاذ آرائی کسی کے مفاد میں نہیں اور اس کے نتیجے میں دونوں ممالک کو نقصان پہنچ سکتا ہے۔

واشنگٹن: امریکی صدر ڈونلڈ ٹرمپ اور چینی صدر شی جن پنگ نے چین اور امریکا کے درمیان تعاون اور باہمی احترام کو فروغ دینے کی ضرورت پر زور دیا ہے۔

چینی صدر کے اعزاز میں دیے گئے عشائیے سے خطاب کرتے ہوئے صدر ٹرمپ نے کہا کہ چین اور امریکا اپنے عوام کی ترقی اور خوشحالی کے لیے کام کرنا چاہتے ہیں۔ انہوں نے کہا کہ دونوں ممالک کے درمیان دیرینہ تعلقات ہیں اور امریکا چین کے ساتھ متوازن تجارتی تعلقات کے لیے کام کر رہا ہے۔

صدر ٹرمپ نے بتایا کہ چینی صدر کے ساتھ سکیورٹی، سپر انٹیلی جنس اور دیگر اہم امور پر بھی تبادلہ خیال ہوا۔

چینی صدر شی جن پنگ نے کہا کہ صدر ٹرمپ اور ان کے درمیان متعدد معاملات پر اتفاق ہوا ہے۔ ان کا کہنا تھا کہ چین اور امریکا کے درمیان محاذ آرائی دونوں ممالک کے لیے نقصان دہ ہوگی، اس لیے دونوں بڑی طاقتوں کو باہمی احترام کا رشتہ برقرار رکھنا چاہیے۔

شی جن پنگ نے کہا کہ دونوں ممالک کو ہار جیت کی دوڑ میں شامل ہونے کے بجائے تعاون پر توجہ دینی چاہیے۔ انہوں نے مزید کہا کہ دنیا اس وقت بڑی تبدیلیوں سے گزر رہی ہے اور مصنوعی ذہانت کی ترقی انسانی کنٹرول میں ہونی چاہیے۔

اس سے قبل وائٹ ہاؤس آمد پر چینی صدر کا پرتپاک استقبال کیا گیا۔ دونوں ممالک کے قومی ترانے بجائے گئے، جبکہ شی جن پنگ نے اہلیہ کے ہمراہ فوجی پریڈ کا معائنہ کیا۔ اس موقع پر بمبار اور لڑاکا طیاروں نے فلائی پاسٹ کے ذریعے چینی صدر کو سلامی بھی پیش کی۔

اسلام آباد: امریکی محکمہ خارجہ نے ویزا فراڈ اور امریکی ویزوں کے ممکنہ غلط استعمال سے متعلق شکایات درج کرانے کیلئے نیا آن لائن پلیٹ فارم متعارف کرا دیا ہے۔

امریکی قونصلیٹ کے ترجمان کے مطابق اس ڈیجیٹل پورٹل کے ذریعے شہری ویزا فراڈ سے متعلق مشتبہ سرگرمیوں کی اطلاع متعلقہ امریکی حکام کو دے سکیں گے۔

ترجمان کا کہنا ہے کہ نئے پورٹل کے قیام کا مقصد عوام کیلئے مشتبہ ویزا فراڈ کی معلومات حکام تک پہنچانے کا طریقہ مزید آسان بنانا ہے۔

امریکی محکمہ خارجہ کے مطابق آن لائن پلیٹ فارم کے ذریعے موصول ہونے والی معلومات حکام کو امریکی ویزوں کے غلط استعمال اور ممکنہ فراڈ کی نشاندہی میں معاونت فراہم کریں گی۔

واشنگٹن: چین کے صدر شی جن پنگ تین روزہ سرکاری دورے پر امریکا پہنچ گئے، جہاں امریکی صدر ڈونلڈ ٹرمپ نے جوائنٹ بیس اینڈریوز پر ان کا غیر معمولی انداز میں استقبال کیا۔

شی جن پنگ اپنی اہلیہ پینگ لی یوان کے ہمراہ امریکی دارالحکومت پہنچے۔ ان کی آمد پر ایئرپورٹ پر تقریباً 100 فٹ طویل ریڈ کارپٹ بچھایا گیا جبکہ امریکی اور چینی پرچموں کے ساتھ فوجی دستے بھی استقبالیہ تقریب میں موجود تھے۔

امریکی فضائیہ کے بینڈ نے دونوں ممالک کے قومی ترانے پیش کیے جبکہ امریکی فوج کی مختلف سروسز کے دستوں نے رسمی پریڈ میں حصہ لیا۔ اس موقع پر توپوں کی سلامی بھی دی گئی۔

شی جن پنگ کی آمد پر امریکی فضائیہ کے B-1 بمبار طیاروں نے جوائنٹ بیس اینڈریوز کے اوپر سے فلائی اوور کیا۔ B-1 امریکی فضائیہ کے طویل فاصلے تک حملے کی صلاحیت رکھنے والے اہم بمبار طیاروں میں شمار ہوتے ہیں۔

استقبالیہ تقریب کے بعد صدر ٹرمپ نے شی جن پنگ کو ان کی گاڑی تک پہنچایا۔ دونوں رہنماؤں نے مختصر گفتگو کی، جس کے بعد چینی صدر واشنگٹن روانہ ہوگئے۔

تین روزہ دورے کے دوران امریکی اور چینی صدور کے درمیان تجارت، ٹیرف، مصنوعی ذہانت، تائیوان اور ایران سمیت متعدد اہم عالمی و دوطرفہ امور پر بات چیت متوقع ہے۔

امریکا اور چین کے درمیان تجارتی تعلقات بھی مذاکرات کا اہم حصہ ہوں گے۔ دونوں ممالک کے درمیان گزشتہ سال طے پانے والے تجارتی انتظام کی مدت نومبر میں ختم ہونے والی ہے، جس کے پیش نظر آئندہ تجارتی معاملات پر بھی گفتگو متوقع ہے۔

دورے کے دوران دونوں صدور کی باضابطہ ملاقات، بند کمرے میں مذاکرات اور سرکاری عشائیے سمیت مختلف تقریبات ہوں گی۔ تاہم دورے کے تمام پروگراموں کی مکمل تفصیلات دونوں حکومتوں کی جانب سے تاحال جاری نہیں کی گئی ہیں۔