واشنگٹن: امریکی صدر ڈونلڈ ٹرمپ نے کہا ہے کہ یوکرین کے ساتھ جنگ کے باعث روس کی ڈیزل آئل انڈسٹری کو شدید نقصان پہنچا ہے اور متعدد ریفائنریاں حملوں کے بعد عارضی طور پر بند ہیں۔

 ٹروتھ سوشل پر جاری بیان میں صدر ٹرمپ نے کہا کہ روس کی بڑی تعداد میں ڈیزل ریفائنریوں کو نشانہ بنایا گیا، جس کے نتیجے میں ان کی پیداوار متاثر ہوئی ہے۔

 ڈونلڈ ٹرمپ نے کہا کہ روس اور یوکرین کے درمیان جاری جنگ ختم ہونی چاہیے، کیونکہ اس کے اثرات صرف دونوں ممالک تک محدود نہیں بلکہ پوری دنیا پر پڑ رہے ہیں۔

 امریکی صدر کے مطابق جنگ کے دوران ہر ماہ تقریباً 25 ہزار افراد ہلاک ہو رہے ہیں، جن میں زیادہ تر فوجی شامل ہیں۔

 ٹرمپ کا یہ بیان ایسے وقت میں سامنے آیا ہے جب روس کی تیل صاف کرنے کی صلاحیت اور عالمی ڈیزل مارکیٹ پر یوکرین کے ڈرون حملوں کے ممکنہ اثرات پر تشویش کا اظہار کیا جا رہا ہے۔

واشنگٹن: امریکی وزیر خزانہ سکاٹ بیسنٹ نے خبردار کیا ہے کہ 23 ستمبر سے ایرانی ایئرلائنز کے عالمی آپریشنز امریکی پابندیوں کی زد میں آ جائیں گے۔

 سکاٹ بیسنٹ نے امریکی نشریاتی ادارے سی این بی سی کو انٹرویو میں کہا کہ ایرانی طیاروں کو لینڈنگ کی صورت میں ایندھن اور لینڈنگ سے متعلق خدمات فراہم نہیں کی جائیں گی۔

 انہوں نے کہا کہ ایرانی ایئرلائنز کو ٹکٹ فروخت کرنے یا دیگر خدمات فراہم کرنے والے اداروں کو امریکی ڈالر کے مالیاتی نظام سے خارج کیے جانے کا خطرہ ہوگا۔

 امریکی وزیر خزانہ کے مطابق یہ اقدامات ایران پر امریکی اقتصادی دباؤ بڑھانے کے لیے پابندیوں کے تحت کیے جا رہے ہیں۔

 سکاٹ بیسنٹ اس سے قبل بھی ایران کے خلاف فیصلہ کن اقتصادی اقدامات اور تہران کے معاشی مقاطعے کا عندیہ دے چکے ہیں۔

 سکاٹ بیسنٹ کے تازہ بیانات چین کے نائب وزیراعظم ہی لیفینگ کے ساتھ اقتصادی مذاکرات کے ایک روز بعد سامنے آئے ہیں۔

انقرہ: ترک وزیر خارجہ حاقان فیدان نے کہا ہے کہ سعودی عرب کو امریکا اور ایران کے درمیان جاری جنگ کا حصہ بنانا ناقابل قبول ہے۔ ان کا کہنا تھا کہ سعودی عرب خود اس تنازع میں شامل ہونا نہیں چاہتا۔ 
 حاقان فیدان نے کہا کہ یمن کے حوثیوں کے مسلسل حملوں کے باعث سعودی عرب کو بعض دفاعی ضروریات پیش آسکتی ہیں، جنہیں ترکیہ پاکستان سمیت طے پانے والے سہ فریقی دفاعی معاہدے کے تحت پورا کرنے پر غور کرے گا۔ 
 ترک وزیر خارجہ نے مشرقِ وسطیٰ کی صورتحال پر تشویش کا اظہار کرتے ہوئے کہا کہ بحران کے معاشی اثرات ناقابلِ برداشت حد تک پہنچ رہے ہیں۔ انہوں نے بتایا کہ لڑائی کے خاتمے کے لیے تمام فریقین کو نئی تجاویز بھی دی گئی ہیں۔  

واشنگٹن: امریکی صدر ڈونلڈ ٹرمپ نے روس اور ایران پر پابندیوں سے متعلق قانون پر دستخط کر دیے، جس کے بعد دونوں ممالک کے خلاف امریکی پابندیوں کا دائرہ مزید وسیع ہوگیا۔

 امریکی میڈیا کے مطابق قانون کے تحت ایران پر پہلے سے عائد پابندیوں میں توسیع کی گئی ہے، جبکہ روس کے خلاف پابندیوں، محصولات اور دیگر اقتصادی اقدامات کا دائرہ بھی بڑھا دیا گیا ہے۔

 امریکی ایوان نمائندگان نے بل کو 159 کے مقابلے میں 262 ووٹوں سے منظور کیا تھا، جبکہ سینیٹ میں بل کے حق میں 86 اور مخالفت میں 11 ووٹ آئے تھے۔

 نئے قانون کے تحت امریکی صدر کو پابندیوں کی خلاف ورزی کرنے والے ممالک پر 100 فیصد تک محصولات عائد کرنے کا اختیار حاصل ہوگا۔

 امریکی میڈیا کے مطابق قانون کے ذریعے روس اور ایران کے خلاف اقتصادی دباؤ بڑھانے کے لیے امریکی انتظامیہ کو مزید اختیارات دیے گئے ہیں۔

واشنگٹن :امریکی صدر ڈونلڈ ٹرمپ کا کہنا ہے کہ ایران مالی اور عسکری بحران کے باعث معاہدے کا خواہاں ہے، لیکن وہ درست معاہدے کے بغیر اس پر غور نہیں کریں گے۔

 انہوں نے عزم ظاہر کیا کہ امریکی عوام ایران کو ہرگز جوہری ہتھیار نہیں بنانے دیں گے، اور جنگ کے فوراً بعد تیل کی قیمتوں میں نمایاں کمی آ جائے گی۔