خوشحال، مضبوط اور خودکفیل پنجاب کی تعمیر میں دیہی خواتین کا کردار بہت اہم ہے، مریم نواز

لاہور: وزیراعلیٰ پنجاب مریم نواز شریف نے دیہی خواتین کے عالمی دن کے موقع پر کہا کہ دیہی خواتین کی محنت، محبت، اور قربانی نہ صرف ہمارے معاشرتی بلکہ اقتصادی استحکام کی بھی بنیاد ہے۔ ان کا کہنا تھا کہ ایک خوشحال، مضبوط اور خودکفیل پنجاب کی تعمیر میں دیہی خواتین کا کردار بہت اہم ہے اور ان کے بغیر یہ ممکن نہیں۔

اپنے پیغام میں مریم نواز نے کہا کہ دیہی خواتین کے حقوق کا دن منانے کا مقصد ان کی محنت اور قربانیوں کا اعتراف کرنا ہے۔ ان خواتین کی انتھک محنت سے نہ صرف پنجاب کی زمین لہلہاتی ہے بلکہ معاشی استحکام بھی آتا ہے۔ انہوں نے کہا کہ دیہی خواتین صرف محنت کرنے والی نہیں، بلکہ وہ پنجاب کی ترقی کے اہم ستون ہیں اور ان کا تحفظ ان کی اولین ترجیح ہے۔

وزیراعلیٰ نے یہ بھی کہا کہ وہ چاہتی ہیں کہ دیہی خواتین صرف کھیتوں تک محدود نہ رہیں، بلکہ وہ خود فیصلے کرنے والی اور معاشی طور پر خودکفیل بنیں۔ ان کا کہنا تھا کہ دیہی خواتین کی طاقت کے بغیر پنجاب کی ترقی ممکن نہیں۔

مریم نواز نے حکومت پنجاب کی جانب سے دیہی خواتین کے لیے شروع کیے گئے مختلف اقدامات کا ذکر کیا، جن میں کسان کارڈ، لائیو سٹاک کارڈ، ہمت کارڈ، بلاسود قرضے، تعلیمی اسکالرشپس اور ہنر مندی کے پروگرام شامل ہیں۔ ان کے مطابق، یہ اقدامات دیہی خواتین کی زندگیوں میں حقیقی تبدیلی لانے کے لیے کیے جا رہے ہیں۔ اس کے علاوہ، دیہی خواتین کے لیے بنیادی صحت کے مراکز کو اپ گریڈ کیا جا رہا ہے اور سکل ڈویلپمنٹ پروگرامز کے ذریعے انہیں خود روزگار کے مواقع فراہم کیے جا رہے ہیں۔

وزیراعلیٰ نے کہا کہ حکومت نے خواتین کے حقوق کے تحفظ کے لیے ورچوئل پولیس سٹیشن بھی قائم کیا ہے تاکہ ہر طبقہ کی خواتین کو تحفظ مل سکے۔

آخر میں، ضلعی انتظامیہ نے کہا کہ دیہی خواتین ملکی ترقی میں اہم کردار ادا کر رہی ہیں، اور سیلاب سے متاثرہ خواتین کے لیے ہر ممکن مدد فراہم کی جائے گی، اس سلسلے میں سروے کا عمل بھی مکمل کر لیا گیا ہے۔