پاکستان نے فلسطین کے لیے فوری امداد روانہ کرنے کا اعلان کر دیا

اسلام آباد: پاکستان نے فلسطین کے لیے فوری امدادی پیکیج فراہم کرنے کا فیصلہ کیا ہے۔ نیشنل ڈیزاسٹر مینجمنٹ اتھارٹی (این ڈی ایم اے) کی جانب سے جاری کردہ بیان میں کہا گیا ہے کہ وزیراعظم کی ہدایت پر 100 ٹن امدادی سامان دو خصوصی طیاروں کے ذریعے فلسطین بھیجا جائے گا۔ یہ امداد اگلے دو دنوں میں روانہ ہو جائے گی۔

امدادی سامان اردن اور مصر کے راستے فلسطین پہنچایا جائے گا، جہاں پاکستانی سفیر ان علاقوں میں امداد کی ترسیل کو یقینی بنائیں گے۔ نائب وزیراعظم اسحاق ڈار اس امدادی مشن کی نگرانی کریں گے۔

حکام کے مطابق امدادی سامان میں خوراک، ادویات اور دیگر ضروری اشیاء شامل ہوں گی تاکہ فلسطینی عوام کی مدد کی جا سکے، جو اس وقت شدید مشکلات کا شکار ہیں۔ اس امدادی پیکیج کے ذریعے پاکستان فلسطین کے ساتھ اپنی یکجہتی اور حمایت کا پیغام دے رہا ہے۔