عالمی مارکیٹ میں بھی سونا سستا

کراچی: ملک میں سونے کی قیمتوں میں ایک بار پھر کمی دیکھنے میں آئی ہے، جس کے بعد صرافہ مارکیٹ میں نرخ مزید نیچے آگئے ہیں۔

آل پاکستان صرافہ بازار ایسوسی ایشن کے مطابق فی تولہ سونا 2 ہزار 300 روپے سستا ہونے کے بعد 4 لاکھ 28 ہزار 936 روپے پر پہنچ گیا ہے۔

اسی طرح 10 گرام سونے کی قیمت میں 1 ہزار 972 روپے کی کمی ہوئی ہے، جس کے بعد اس کی نئی قیمت 3 لاکھ 67 ہزار 743 روپے مقرر کی گئی ہے۔

عالمی مارکیٹ میں بھی سونے کے ریٹس میں کمی ریکارڈ کی گئی ہے، جہاں فی اونس قیمت 23 ڈالر کم ہو کر 4 ہزار 65 ڈالر تک آگئی ہے۔

چاندی کی قیمتوں میں بھی کمی کا رجحان دیکھا گیا ہے۔ فی تولہ چاندی 69 روپے کمی کے بعد 6 ہزار 324 روپے جبکہ 10 گرام چاندی 5 ہزار 421 روپے کی سطح پر ٹریڈ ہو رہی ہے۔

صرافہ ڈیلرز کے مطابق مقامی مارکیٹ میں قیمتوں میں یہ کمی عالمی مارکیٹ میں سونے کے نرخ گرنے اور ڈالر کی قدر میں اتار چڑھاؤ کے باعث سامنے آئی ہے۔

ماہرین کا کہنا ہے کہ عالمی معاشی حالات اور بین الاقوامی مارکیٹ کے رجحانات آئندہ دنوں میں بھی سونے کی قیمتوں پر اثر ڈال سکتے ہیں۔