جنرل عامر رضا کی خوش آئند تقرری

پاکستان کی عسکری تاریخ میں بعض تقرریاں صرف انتظامی تبدیلی نہیں ہوتیں بلکہ وہ مستقبل کی حکمتِ عملی، قومی سلامتی کے وژن اور دفاعی اداروں کی سمت کا بھی اظہار کرتی ہیں۔ لیفٹیننٹ جنرل سید عامر رضا کو فور سٹار جنرل کے عہدے پر ترقی دے کر پاکستان کے پہلے کمانڈر نیشنل سٹریٹیجک کمانڈ کے منصب پر فائز کرنا بھی ایک ایسی ہی اہم پیش رفت ہے۔ یہ تقرری ایسے وقت میں سامنے آئی ہے جب خطے میں سکیورٹی کے چیلنجز مسلسل پیچیدہ ہو رہے ہیں، عالمی طاقتوں کے درمیان نئی صف بندیاں تشکیل پا رہی ہیں اور پاکستان کو بیک وقت روایتی اور غیر روایتی خطرات کا سامنا ہے۔
جنرل سید عامر رضا نے 1988 میں پاک فوج کی ممتاز آرمڈ رجمنٹ 6 لانسرز میں کمیشن حاصل کیا اور اپنے کیریئر کے دوران مرحلہ وار ہر اہم ذمہ داری کامیابی سے نبھائی۔ ایک نوجوان افسر سے لے کر فور سٹار جنرل تک کا یہ سفر اس بات کا غماز ہے کہ انہوں نے میدانِ عمل، ادارہ جاتی نظم و نسق اور عسکری منصوبہ بندی کے ہر مرحلے میں اپنی صلاحیتوں کا عملی ثبوت دیا۔ان کے کیریئر کی سب سے نمایاں خصوصیت یہ ہے کہ انہوں نے صرف کمان کے میدان میں ہی نہیں بلکہ سٹاف، تربیت اور دفاعی صنعت کے شعبوں میں بھی یکساں مہارت کا مظاہرہ کیا۔ رجمنٹ، انفنٹری بریگیڈ، آرمڈ بریگیڈ اور انفنٹری ڈویژن کی کمان جیسی اہم ذمہ داریاں کسی بھی فوجی افسر کے لیے بڑے امتحان سے کم نہیں ہوتیں۔ ان مناصب پر کامیاب خدمات اس امر کی نشاندہی کرتی ہیں کہ جنرل عامر رضا فوجی قوت کی تنظیم، منصوبہ بندی اور قیادت کی صلاحیت بھی رکھتے ہیں۔انہوں نے نوشہرہ کے آرمڈ سکول اور دیگر عسکری تربیتی اداروں میں بطور انسٹرکٹر خدمات انجام دیں، جبکہ کمانڈ اینڈ سٹاف کالج کوئٹہ میں تدریسی ذمہ داریاں بھی نبھائیں۔ ایک بہترین فوجی وہی سمجھا جاتا ہے جو صرف خود سیکھنے تک محدود نہ رہے بلکہ آنے والی نسلوں کو بھی اپنی مہارت منتقل کرے۔ جنرل عامر رضا کا یہ کردار ظاہر کرتا ہے کہ وہ علم اور عملی تجربے کے امتزاج پر یقین رکھتے ہیں۔ وہ کمانڈ اینڈ سٹاف کالج کوئٹہ اور نیشنل ڈیفنس یونیورسٹی اسلام آباد کے گریجویٹ ہیں، جبکہ برطانیہ سے ماسٹرز کی ڈگری حاصل کر چکے ہیں۔ جدید عسکری قیادت کے لیے عالمی رجحانات، دفاعی ٹیکنالوجی، سٹریٹیجک سٹڈیز اور بین الاقوامی ماحول سے آگاہی ناگزیر سمجھی جاتی ہے اور ان کی تعلیمی تیاری اس ضرورت سے ہم آہنگ نظر آتی ہے۔
اپریل 2020 میں ہیوی انڈسٹریز ٹیکسلا کے چیئرمین کی حیثیت سے ان کی ذمہ داریاں بھی غیر معمولی اہمیت رکھتی تھیں۔ دفاعی پیداوار کسی بھی ملک کی خودمختاری کا بنیادی ستون ہوتی ہے۔ مقامی سطح پر جدید عسکری سازوسامان کی تیاری، تحقیق اور ٹیکنالوجی کی ترقی میں مضبوط قیادت نہ صرف درآمدی انحصار کم کرتی ہے بلکہ قومی دفاع کو بھی مستحکم بناتی ہے۔ بعد ازاں چیف آف جنرل سٹاف کے منصب پر ان کی تعیناتی نے ان کے تجربے میں مزید وسعت پیدا کی۔ یہ منصب پاک فوج میں انتہائی اہم سمجھا جاتا ہے کیونکہ اس کے ذریعے آپریشنل منصوبہ بندی، مختلف فارمیشنز کے درمیان رابطہ، عسکری تیاری اور اعلیٰ سطح کی فیصلہ سازی میں مرکزی کردار ادا کیا جاتا ہے۔ ایسے منصب پر کامیاب خدمات اس بات کی دلیل ہیں کہ جنرل عامر رضا پیچیدہ معاملات میں متوازن فیصلے کرنے کی صلاحیت رکھتے ہیں۔ انہیں ہلالِ امتیاز (ملٹری) اور ستارہ بسالت جیسے اعلیٰ عسکری اعزازات سے نوازا جانا بھی ان کی پیشہ ورانہ خدمات کے اعتراف کا اظہار ہے۔ کمانڈر نیشنل سٹریٹیجک کمانڈ کے طور پر ان کی ذمہ داری پاکستان کی دفاعی حکمتِ عملی کے ایک نہایت حساس اور اہم شعبے سے متعلق ہو گی۔ اگرچہ اس ادارے کی عملی ذمہ داریوں کی تمام تفصیلات عوامی سطح پر دستیاب نہیں ہوتیں، تاہم عمومی طور پر اس نوعیت کے سٹریٹیجک مناصب قومی سلامتی، طویل المدتی دفاعی منصوبہ بندی، بین الادارہ جاتی ہم آہنگی اور حساس دفاعی امور میں کلیدی کردار ادا کرتے ہیں۔ ایسے منصب پر ایک تجربہ کار اور متوازن مزاج افسر کی موجودگی ادارہ جاتی استحکام کے لیے مفید ثابت ہو سکتی ہے۔موجودہ دور میں پاکستان کو صرف سرحدی دفاع ہی نہیں بلکہ سائبر سکیورٹی، مصنوعی ذہانت، ڈرون ٹیکنالوجی، خلائی صلاحیتوں، معلوماتی جنگ اور ہائبرڈ خطرات جیسے نئے چیلنجز کا بھی سامنا ہے۔ مستقبل کی جنگیں صرف ٹینکوں اور توپوں سے نہیں بلکہ ٹیکنالوجی، معلومات اور سٹریٹیجک برتری سے جیتی جائیں گی۔ ایسے حالات میں وہ قیادت زیادہ مو¿ثر ثابت ہوتی ہے جو روایتی عسکری تجربے کے ساتھ جدید دفاعی تقاضوں کو بھی سمجھتی ہو۔ جنرل عامر رضا کا متنوع تجربہ اس حوالے سے ایک مثبت پہلو تصور کیا جا سکتا ہے۔ بعض مبصرین کا خیال ہے کہ فیلڈ مارشل سید عاصم منیر کی بین الاقوامی امور میں مصروفیت ، عالمی سطح پر پاکستان کی عسکری سفارت کاری اور اعلیٰ سطح بین الاقوامی روابط میں اضافے کے تناظر میں داخلی دفاعی منصوبہ بندی کے لیے مضبوط ادارہ جاتی قیادت کی ضرورت پہلے سے زیادہ محسوس کی جا رہی تھی۔ اگرچہ اس بارے میں مختلف آرا موجود ہیں، لیکن اس میں کوئی شبہ نہیں کہ قومی سلامتی کا مو¿ثر نظام ٹیم ورک، واضح اختیارات اور تجربہ کار قیادت کا متقاضی ہوتا ہے۔
حقیقت یہ ہے کہ کسی بھی ملک کی ترقی کا انحصار صرف مضبوط معیشت پر نہیں بلکہ محفوظ سرحدوں، مستحکم دفاعی اداروں اور دور اندیش قیادت پر بھی ہوتا ہے۔ جب قومی سلامتی کا نظام مضبوط ہو تو سرمایہ کاری، صنعتی ترقی، تجارتی سرگرمیوں اور عوامی اعتماد کے فروغ کے امکانات بھی بڑھتے ہیں۔ اسی لیے دفاعی اداروں میں میرٹ، پیشہ ورانہ صلاحیت اور تجربے کی بنیاد پر ہونے والی تقرریاں قومی مفاد میں اہم سمجھی جاتی ہیں۔ جنرل عامر رضا کی فورسٹار جنرل کے عہدے پر ترقی اور کمانڈر نیشنل سٹریٹیجک کمانڈ کے طور پر تقرری بلاشبہ ایک اہم قومی پیش رفت ہے۔ ان کا طویل عسکری تجربہ، اعلیٰ پیشہ ورانہ تربیت، دفاعی صنعت سے وابستگی، منصوبہ بندی کی صلاحیت اور قائدانہ کردار اس منصب کے تقاضوں سے مطابقت رکھتے ہیں۔ قوم کی توقع ہے کہ وہ اپنی ذمہ داریاں اسی دیانت، بصیرت اور پیشہ ورانہ مہارت سے انجام دیں گے جس کا مظاہرہ انہوں نے اپنے پورے عسکری کیریئر میں کیا ہے، تاکہ پاکستان کا دفاع مزید مضبوط ہو، قومی سلامتی کا نظام مزید مو¿ثر بنے اور ملک استحکام، ترقی اور خوشحالی کی راہ پر مزید اعتماد کے ساتھ آگے بڑھ سکے۔ مین دل کی اتھاہ گہرائیوں سے وزیر اعظم شہباز شریف اور فیلڈ مارشل سید عاصم منیر کو مبارکباد پیش کرتا ہوں کہ انہوں نے ایک ایسے افسر کو اہم ذمہ داریاں تفویض کی ہیں جو ملک کو محفوظ بنانے کی برپور صلاحیت رکھتا ہے اور پاکستان سے بے تحاشا محبت کرتا ہے۔