ملک کے کئی علاقوں میں شدید بارشوں کا امکان، ندی نالوں میں طغیانی کا خدشہ

لاہور : محکمہ موسمیات نے خبردار کیا ہے کہ اگلے چند دنوں میں ملک کے مختلف حصوں میں شدید بارشیں ہو سکتی ہیں جس سے ندی نالوں میں طغیانی کا خطرہ بڑھ جائے گا۔ 29 اگست کو بحیرہ عرب اور خلیج بنگال سے مون سون کی ہوائیں پاکستان پہنچیں گی اور 30 اگست سے مغربی ہوائیں بھی ملک میں داخل ہوں گی۔

29 اگست سے 2 ستمبر کے درمیان بالائی اور وسطی علاقوں میں بارشوں کا سلسلہ جاری رہنے کا امکان ہے۔ خاص طور پر کشمیر، مری، اسلام آباد اور راولپنڈی میں ندی نالے طغیانی کا شکار ہو سکتے ہیں۔ ساتھ ہی چترال، دیر، سوات، شانگلہ، بونیر، صوابی اور مردان کے ندی نالوں میں بھی طغیانی کا خدشہ ہے۔

لاہور، گوجرانوالہ، سیالکوٹ، فیصل آباد، پشاور اور مردان کے نچلے علاقوں میں پانی جمع ہونے کا بھی امکان ہے۔ محکمہ موسمیات نے کہا ہے کہ خیبرپختونخوا، گلگت بلتستان، مری اور کشمیر میں لینڈ سلائیڈنگ کا بھی خطرہ موجود ہے۔

اس کے علاوہ، بارش اور آندھی کے باعث کمزور عمارتوں، کھمبوں اور بل بورڈز کو نقصان پہنچنے کا بھی خدشہ ہے۔ اس لیے شہریوں کو محتاط رہنے کی ہدایت کی گئی ہے۔