نئے آئی فون 17 سیریز میں خراشوں کا مسئلہ، صارفین میں مایوسی پھیل گئی

نئی دہلی/سان فرانسسکو: ایپل کے تازہ ترین آئی فون 17 سیریز کی لانچ کے چند دنوں کے اندر ہی صارفین نے ایک سنگین مسئلہ سامنے لایا ہے۔ صارفین کا کہنا ہے کہ نئے ماڈلز خاص طور پر آئی فون 17 پرو، پرو میکس اور آئی فون 17 ائیر جلدی سے خراشیں پکڑ لیتے ہیں جس کی وجہ سے ان کی ڈیوائسز کی خوبصورتی اور کارکردگی متاثر ہو رہی ہے۔

ایپل نے 9 ستمبر کو آئی فون 17 سیریز کو متعارف کرایا تھا اور 19 ستمبر سے ان کی فروخت شروع ہوئی۔ تاہم چند گھنٹوں کے اندر ہی سوشل میڈیا پر صارفین نے تصاویر اور ویڈیوز شیئر کر کے بتایا کہ یہ فونز آسانی سے خراشیں کھا جاتے ہیں اور ان کے بیک اور کناروں پر واضح نقوش بن جاتے ہیں۔

خاص طور پر نیلے اور نارنجی رنگ کے ماڈلز زیادہ متاثر نظر آئے ہیں۔ ٹیکنالوجی کے ماہرین نے بھی ویڈیوز میں فونز کو مختلف سخت اشیاء جیسے چابیاں، چاقو اور سکے کے ذریعے ٹیسٹ کیا جس سے خراشیں لگنا آسان ثابت ہوا۔

ایپل نے پہلے دعویٰ کیا تھا کہ ان کے فونز کی سکرین اور بیک پر استعمال ہونے والا سرامک شیلڈ 3 گنا زیادہ خراشوں سے حفاظت فراہم کرتا ہے، لیکن صارفین کی شکایات سے ظاہر ہوتا ہے کہ یہ دعویٰ حقیقت کے برعکس ہے۔

ابھی تک ایپل کی جانب سے اس معاملے پر کوئی باضابطہ ردعمل نہیں آیا، لیکن یہ مسئلہ کمپنی کے لیے ایک تشویشناک صورتحال پیدا کر سکتا ہے، خاص طور پر ایسے وقت میں جب مارکیٹ میں مقابلہ سخت ہے۔