ایران پر امریکی-اسرائیلی حملے سترہویں دن میں داخل ، تہران اور دوحہ میں دھماکے، بیروت پر بمباری، بغداد میں امریکی سفارتخانہ پھر نشانہ

تہران: ایران پر امریکی اور اسرائیلی حملے سترہویں روز میں داخل ہو گئے ہیں۔ تہران اور دیگر شہروں میں متعدد دھماکے ہوئے، جبکہ ایرانی پاسداران انقلاب نے اسرائیل اور امریکی اہداف پر میزائل اور ڈرون حملوں کی نئی لہر شروع کی، جس سے اسرائیل میں آگ بھڑک اٹھی اور کئی عمارتیں اور گاڑیاں تباہ ہو گئیں۔

اطلاعات کے مطابق ایران میں ہلاکتیں 1500 سے زیادہ ہو چکی ہیں اور زخمیوں کی تعداد 18 ہزار سے تجاوز کر گئی ہے۔ لبنان میں بھی تقریباً 900 شہری ہلاک ہو چکے ہیں۔ اسرائیل میں 15 افراد ہلاک ہوئے اور درجنوں زخمی ہوئے، تاہم حتمی تعداد پر اسرائیلی حکام خاموش ہیں۔

عراقی دارالحکومت بغداد میں امریکی سفارتخانے پر بھی راکٹ اور ڈرون حملے کیے گئے، جبکہ متحدہ عرب امارات میں بھی ڈرون حملوں کے بعد آگ پر قابو پا لیا گیا۔ ایران کی جانب سے اب تک یو اے ای پر 1900 سے زائد میزائل اور ڈرون حملے کیے جا چکے ہیں۔

ایران کے وزیر خارجہ نے کہا ہے کہ آبنائے ہرمز دشمنوں کے لیے بند رہے گی اور امریکا کے ساتھ کوئی بات چیت یا جنگ بندی میں دلچسپی نہیں ہے۔ ایرانی سکیورٹی حکام نے مسلم ممالک سے امریکی-اسرائیلی جارحیت کے خلاف حمایت کی اپیل کی۔

یورپی یونین نے خطے میں کسی فوجی کارروائی میں حصہ لینے سے انکار کیا اور کشیدگی کم کرنے کے لیے سفارتکاری کو ترجیح دینے کا فیصلہ کیا۔