پاکستان بھر میں یومِ تشکر عقیدت و احترام کے ساتھ منایا جا رہا ہے

اسلام آباد: آج پاکستان بھر میں یومِ تشکر عقیدت و احترام کے ساتھ منایا جا رہا ہے۔ یہ دن اس تاریخی فتح کی یاد میں منایا جا رہا ہے جس نے پوری قوم کا سر فخر سے بلند کر دیا۔

دن کا آغاز مساجد میں قرآن خوانی اور دعاؤں سے ہوا، جہاں لوگوں نے پاکستان کی سلامتی، ترقی اور شہداء کے لیے دعا کی۔ اس موقع پر وفاقی دارالحکومت اسلام آباد میں 31 توپوں اور تمام صوبائی دارالحکومتوں میں 21، 21 توپوں کی سلامی دی گئی۔

پاک فوج کے چاق و چوبند دستوں نے فلک شگاف "اللہ اکبر" کے نعروں سے دن کی تقریبات کا آغاز کیا۔ جوانوں نے ملک کی بقا اور استحکام کے لیے دعائیں کیں اور اپنے عزم کی تجدید کی۔

مزار قائد کراچی اور مزار اقبال لاہور پر گارڈز کی تبدیلی کی پروقار تقریبات ہوئیں، جبکہ ملک بھر میں یادگارِ شہداء پر پھول چڑھائے گئے اور شہداء کو خراجِ عقیدت پیش کیا گیا۔ وفاقی اور صوبائی دارالحکومتوں میں پرچم کشائی کی تقاریب منعقد ہوئیں جن میں قومی ترانے کی دھنیں بجائی گئیں اور حاضرین نے ملک سے محبت کا اظہار کیا۔

 یومِ تشکر کی مرکزی تقریب اسلام آباد کے پاکستان مونومنٹ میں منعقد ہو رہی ہے، جہاں وزیراعظم پاکستان مہمانِ خصوصی ہیں۔ اس تقریب میں مسلح افواج کے سربراہان اور چیئرمین جوائنٹ چیفس آف اسٹاف کمیٹی سمیت اعلیٰ حکام بھی شریک ہیں۔ یہ دن ہمیں یاد دلاتا ہے کہ قوم جب ایک ہو جائے تو کوئی چیلنج ناقابلِ عبور نہیں رہتا، اور فتح یقینی ہو جاتی ہے۔