فیس بک کی کارروائی: لاکھوں جعلی اکاؤنٹس حذف، اصل صارفین کو ترجیح

امریکہ :میٹا کے زیر انتظام سوشل میڈیا پلیٹ فارم فیس بک نے 2025 کے ابتدائی چھ ماہ کے دوران ایک بڑے احتسابی اقدام کے تحت تقریباً ایک کروڑ جعلی اکاؤنٹس کو پلیٹ فارم سے ہٹا دیا۔

سی این بی سی کی رپورٹ کے مطابق، میٹا نے وضاحت کی کہ یہ جعلی پروفائلز عموماً مشہور شخصیات یا معروف تخلیق کاروں کی نقالی کرتے تھے، جن کا مقصد دھوکہ دہی یا غیر مستند مواد کو پھیلانا تھا۔

اس کارروائی کا بنیادی مقصد پلیٹ فارم پر مستند اور خالص مواد کو فروغ دینا اور صارفین کو جعلی معلومات یا سرقہ شدہ پوسٹس سے بچانا ہے۔ میٹا نے بتایا کہ اصل تخلیق کاروں کی تحریروں کو دوبارہ نمایاں کیا گیا ہے جنہیں جعلی اکاؤنٹس کی جانب سے دبا دیا گیا تھا۔

مصنوعی ذہانت (AI) اور دیگر جدید سسٹمز کی مدد سے جعلی یا چوری شدہ مواد کی شناخت کی گئی۔ ایسے صارفین جنہوں نے بار بار دوسروں کا مواد نقل کیا، ان کی آمدنی کی سہولت معطل کر دی گئی ہے۔

میٹا کے ترجمان کے مطابق، یہ صفائی مہم صرف ایک ابتدا ہے اور مستقبل میں بھی AI ٹولز کے ذریعے جعلی اکاؤنٹس اور نقلی مواد کے خلاف کارروائیاں جاری رکھی جائیں گی۔