سیلاب کا خطرہ بڑھ گیا، شیر شاہ بند میں شگاف ڈالنے کا فیصلہ

ملتان:دریائے چناب میں پانی کی سطح خطرناک حد تک بڑھنے کے بعد شیر شاہ بند میں جان بوجھ کر شگاف ڈالنے کا فیصلہ کیا گیا ہے تاکہ بند پر پڑنے والا دباؤ کم کیا جا سکے۔ محکمہ انہار کے مطابق، بند کے آس پاس کی آبادیوں کو بروقت اطلاع دے دی گئی ہے اور ان سے کہا گیا ہے کہ فوری طور پر محفوظ مقامات پر منتقل ہو جائیں۔

ذرائع کے مطابق، چناب کے بیٹ کے علاقے پہلے ہی پانی سے بھر چکے ہیں اور مزید پانی برداشت کرنے کی گنجائش نہیں بچی، اسی لیے یہ قدم اٹھایا جا رہا ہے۔ بتایا جا رہا ہے کہ تریموں ہیڈ سے 5 لاکھ 40 ہزار کیوسک کا ریلا دو دن کے اندر ملتان کی طرف آ رہا ہے، جس سے صورتحال مزید خراب ہو سکتی ہے۔

دوسری طرف، ڈی جی پی ڈی ایم اے عرفان کاٹھیا نے خبردار کیا ہے کہ ملتان اگلے 48 گھنٹے ہائی رسک زون میں رہے گا۔ انہوں نے کہا کہ لوگوں کو احتیاط کرنی چاہیے اور مقامی انتظامیہ کے ساتھ تعاون کرنا چاہیے۔

اب تک کی اطلاعات کے مطابق پنجاب بھر میں لاکھوں لوگ متاثر ہو چکے ہیں، بہت سے دیہات زیرِ آب آ چکے ہیں اور ہزاروں افراد کو نقل مکانی کرنی پڑی ہے۔ ریسکیو ٹیمیں، فوج، اور ضلعی انتظامیہ مل کر امدادی کاموں میں مصروف ہیں۔

انتظامیہ نے عوام سے اپیل کی ہے کہ وہ افواہوں پر یقین نہ کریں، سرکاری اعلانات پر عمل کریں اور کسی بھی ایمرجنسی کی صورت میں فوری طور پر مدد کے لیے رجوع کریں۔