غزہ سے کشمیر تک ظلم کے پہاڑ توڑے جا رہے ہیں، مسلمانوں کو متحد ہونا ہوگا: خواجہ آصف

اسلام آباد : وزیر دفاع خواجہ آصف نے یوم اقبال کے موقع پر ایک اہم پیغام دیتے ہوئے کہا ہے کہ غزہ سے کشمیر تک مسلمانوں پر ظلم و ستم کی انتہاء ہو چکی ہے، اور اب وقت آ گیا ہے کہ امت مسلمہ کو اپنے اختلافات بھلا کر یکجہتی کے ساتھ سامنے آنا ہوگا۔ انہوں نے کہا کہ اگر مسلمان اتحاد نہیں پیدا کرتے تو وہ اسی طرح ظلم و جبر کا شکار رہیں گے جس کا سامنا اس وقت فلسطین، غزہ اور کشمیر کے مسلمانوں کو ہے۔

خواجہ آصف نے مزید کہا کہ ہمیں علامہ اقبال کے پیغام کو زندہ کرنا ہوگا، کیونکہ ان کی شاعری اور فلسفہ آج بھی ہماری رہنمائی کے لیے اہم ہیں۔ انہوں نے اس بات پر زور دیا کہ علامہ اقبال اور قائداعظم جیسے عظیم رہنماؤں کو کبھی نہیں بھولنا چاہیے، کیونکہ وہ قوم کے محسن ہیں جنہوں نے پاکستان کے قیام کا خواب دیکھا۔

وزیر دفاع نے کہا کہ امت مسلمہ اس وقت ایک بہت بڑی آزمائش سے گزر رہی ہے، اور یہ ضروری ہے کہ ہم صرف اپنی مملکت کے دفاع کے بجائے غزہ، فلسطین اور کشمیر کے مظلوم مسلمانوں کے حق میں آواز بلند کریں۔

 خواجہ آصف نے کہا کہ ہمیں اپنے محسنوں کے پیغام کو یاد رکھتے ہوئے ان کے خواب کو حقیقت میں بدلنے کے لیے اپنا کردار ادا کرنا ہوگا۔ انہوں نے اس بات پر افسوس کا اظہار کیا کہ آج ہم شاعر مشرق کے پیغام کو بھلا چکے ہیں، حالانکہ علامہ اقبال کا فلسفہ اور شاعری نہ صرف برصغیر کے مسلمانوں کے لیے، بلکہ پوری امت کے لیے رہنمائی فراہم کرتی ہے۔

خواجہ آصف کا کہنا تھا کہ اللہ تعالی ہمیں ہمت دے تاکہ ہم فلسطین، غزہ اور کشمیر کے مظلوم مسلمانوں کے حقوق کے لیے لڑ سکیں اور ان کے ساتھ کھڑے ہو سکیں۔"علامہ اقبال کا پیغام آج بھی ہماری رہنمائی کے لیے اہم ہے۔ ہمیں اپنی وحدت کو مضبوط کرنا ہوگا تاکہ ہم اپنے مظلوم بھائیوں کی مدد کر سکیں اور عالم اسلام کی تقدیر بدل سکیں۔"