جاپانی ین کو سہارا دینے کے لیے امریکا اور جاپان کا بڑا اقدام

ٹوکیو: جاپانی کرنسی ین کی مسلسل گراوٹ روکنے کے لیے جاپان اور امریکا نے کرنسی مارکیٹ میں مشترکہ مداخلت کی ہے، جس کے نتیجے میں ین کی قدر میں استحکام دیکھنے میں آیا ہے۔

جاپانی وزارت خزانہ نے تصدیق کی ہے کہ دونوں ممالک نے ین خریدنے کے لیے مربوط کارروائی کی، جبکہ آئندہ ضرورت پڑنے پر مزید اقدامات کا عندیہ بھی دیا گیا ہے۔

حالیہ ہفتوں میں ین امریکی ڈالر کے مقابلے میں تقریباً 40 سال کی کم ترین سطح کے قریب پہنچ گیا تھا اور ایک ڈالر کی قیمت 163.99 ین تک جا پہنچی تھی۔

مشترکہ کارروائی کے بعد پیر کو ین کی قدر میں بہتری آئی اور ایک ڈالر کی قیمت 156.47 ین ریکارڈ کی گئی۔

ماہرین کے مطابق مارکیٹ میں مداخلت سے ین کو وقتی سہارا ملا ہے، تاہم مستقل مضبوطی کے لیے جاپان کی معاشی صورتحال، شرح سود اور مالیاتی پالیسیوں میں بہتری اہم کردار ادا کرے گی۔

دوسری جانب امریکی حکام نے بھی جاپان کے ساتھ تعاون جاری رکھنے کا عندیہ دیا ہے تاکہ عالمی کرنسی مارکیٹ میں استحکام برقرار رکھا جا سکے۔