وزیر اعلیٰ پنجاب مریم نواز شریف سے ساہیوال ڈویژن کے ارکان اسمبلی کی ملاقات، ترقیاتی منصوبوں پر بات چیت

لاہور: وزیر اعلیٰ پنجاب مریم نواز شریف سے ساہیوال ڈویژن کے ارکان قومی و صوبائی اسمبلی اور پارٹی ٹکٹ ہولڈرز نے ملاقات کی، جس میں صوبے میں جاری ترقیاتی منصوبوں اور اصلاحات پر تفصیلی تبادلہ خیال کیا گیا۔

ملاقات کے دوران ارکان اسمبلی نے پنجاب بھر میں 20 ہزار کلومیٹر سڑکوں کی بحالی پر وزیر اعلیٰ مریم نواز شریف کی کوششوں کو سراہا اور اس بات پر زور دیا کہ اس سے عوام کو بڑا فائدہ پہنچا ہے۔ انہوں نے وزیر اعلیٰ کی قیادت میں جدید کیتھ لیبز کے قیام اور الیکٹرو بسوں کے آغاز کو بھی عوامی فلاح کے اہم منصوبے قرار دیا۔

وزیر اعلیٰ مریم نواز شریف نے اس موقع پر کہا کہ "عوام کی خدمت، تیز رفتار ترقی اور شفاف گورننس مسلم لیگ ن کا بنیادی مقصد ہے۔" انہوں نے مزید کہا کہ پنجاب میں جرائم کی شرح میں کمی آئی ہے، اور صوبے میں امن و امان کی صورتحال بہتر ہوئی ہے۔ ان کا کہنا تھا کہ سڑکوں اور پبلک ٹرانسپورٹ کی بحالی صرف ایک انفراسٹرکچر کا مسئلہ نہیں ہے، بلکہ یہ روزگار کے مواقع پیدا کرنے اور خوشحالی کی راہ ہموار کرنے کا ذریعہ بھی ہے۔ مریم نواز نے "ستھرا پنجاب" پروگرام کو ایک نئے کلچر کی علامت قرار دیا، جس کے تحت صفائی کے ساتھ ساتھ معاشرتی ترقی بھی ممکن ہو رہی ہے۔

اراکین اسمبلی نے وزیر اعلیٰ کی قیادت کی تعریف کرتے ہوئے کہا کہ "پنجاب آج ایک ترقی کرتا ہوا، صاف اور پُرامن صوبہ بن چکا ہے۔" ان کا کہنا تھا کہ مریم نواز شریف نے صوبے میں ترقیاتی کاموں کی رفتار کو نئی بلندیوں تک پہنچایا ہے، اور کیتھ لیبز اور الیکٹرو بس سروس جیسے منصوبے عوامی فلاح کی روشن مثال ہیں، جن سے ہر طبقہ فائدہ اٹھا رہا ہے۔