لاہور : وزیراعلیٰ پنجاب مریم نواز شریف نے چین کی پیپلز لبریشن آرمی کے 98ویں یومِ تاسیس پر چین کی حکومت، عوام اور مسلح افواج کو مبارکباد دی ہے۔ انہوں نے کہا کہ چین کی مسلح افواج کا عالمی اور قومی امن کے لیے کردار بہت قابلِ تعریف ہے۔
مریم نواز نے اپنے پیغام میں کہا کہ "ہم اپنے آہنی بھائی کو سلام پیش کرتے ہیں"۔ ان کا کہنا تھا کہ پاک چین تعلقات صرف دفاعی یا ریاستی مفادات تک محدود نہیں بلکہ یہ ایک مضبوط دوستی کی علامت ہیں جو دلوں کے رشتوں پر مبنی ہیں۔
انہوں نے پیپلز لبریشن آرمی کی پیشہ ورانہ مہارت، جدید عسکری حکمت عملی اور قومی خدمت کے جذبے کو سراہتے ہوئے کہا کہ پاک چین افواج کے درمیان باہمی اعتماد، تربیت اور دفاعی تعاون وقت کے ساتھ مزید مضبوط ہوا ہے۔
مریم نواز نے یہ بھی کہا کہ پنجاب حکومت چین کے ساتھ مختلف شعبوں جیسے صنعتی ترقی، ماحولیات، زراعت اور تعلیم میں مشترکہ منصوبوں کو مزید فروغ دینے کے لیے پرعزم ہے۔ یہ بیان دونوں ممالک کے درمیان تعلقات کو مزید مستحکم کرنے کی کوششوں کو ظاہر کرتا ہے۔
NaiBaat | Copyright © 2026
