جنرل عاصم منیر کا عید الفطر کے موقع پر وانا اور ڈیرہ اسماعیل خان کا دورہ

راولپنڈی: عید الفطر کے موقع پر چیف آف آرمی سٹاف جنرل سید عاصم منیر نے جنوبی وزیرستان کے علاقے وانا اور ڈیرہ اسماعیل خان کے چکّن کا دورہ کیا، جہاں انہوں نے مغربی سرحد پر تعینات افسران اور جوانوں کے ساتھ عید منائی۔ آرمی چیف نے عید کی نماز بھی ادا کی اور پاکستان کی سلامتی، استحکام اور خوشحالی کے لیے دعا کی۔

پاک فوج کے شعبہ تعلقات عامہ (آئی ایس پی آر) کے مطابق، آرمی چیف نے جوانوں کی بے لوث خدمات اور غیر متزلزل عزم کی تعریف کی اور کہا، "آپ کی قربانیاں ہمارے وطن کے دفاع کی ضمانت فراہم کرتی ہیں اور پاکستان سے آپ کی محبت کا غماز ہیں۔"

آرمی چیف نے مسلح افواج اور قانون نافذ کرنے والے اداروں کی دہشت گردی کے خلاف کارکردگی کو سراہا اور شہداء کی قربانیوں کو خراجِ عقیدت پیش کیا، یہ کہتے ہوئے کہ ان کی قربانیاں ہمارے کامیابی کی اصل وجہ ہیں۔