وزیراعلیٰ مریم نواز کا طوفانی بارشوں کے پیشِ نظر واسا اور انتظامیہ کو فیلڈ میں پہنچنے کا حکم

لاہور :پنجاب کے مختلف اضلاع میں طوفانی بارشوں کے آغاز کے ساتھ ہی وزیراعلیٰ مریم نواز شریف نے صوبائی انتظامیہ اور متعلقہ اداروں کو ہائی الرٹ کر دیا۔ وزیراعلیٰ نے ہنگامی ہدایات جاری کرتے ہوئے تمام واسا (WASA) حکام کو حکم دیا ہے کہ وہ دفاتر چھوڑ کر فیلڈ میں آئیں اور بارشی پانی کی فوری نکاسی کو یقینی بنائیں۔

وزیراعلیٰ پنجاب نے سخت رخ اختیار کرتے ہوئے کہا کہ شہری اور گنجان آباد علاقوں (اربن ایریاز) میں نکاسیِ آب کے نظام کو چوبیس گھنٹے فعال رکھا جائے اور کہیں بھی پانی کھڑا نہ ہونے دیا جائے۔ انہوں نے متعلقہ محکموں کو ہدایت کی کہ ڈرینج سسٹم اور پمپنگ اسٹیشنز کی کارکردگی کی مسلسل نگرانی کی جائے۔

مریم نواز شریف کا کہنا تھا کہ شہریوں کی جان و مال کا تحفظ اور ان کی سہولت حکومت کی اولین ترجیح ہے۔ طوفانی بارشوں کے دوران کسی بھی ہنگامی صورتحال سے نمٹنے کے لیے واسا آپریشنز کی مؤثر مانیٹرنگ کی جائے اور غفلت برتنے والے افسران کے خلاف سخت کارروائی عمل میں لائی جائے گی۔