دوسرا ٹی20: پاکستان نے بنگلہ دیش سے ٹاس جیت کر پہلے بیٹنگ کا فیصلہ کر لیا

لاہور: پاکستان اور بنگلہ دیش کے درمیان جاری تین میچوں کی ٹی ٹوئنٹی سیریز کے دوسرے مقابلے میں پاکستان نے ٹاس جیت کر بیٹنگ کرنے کا فیصلہ کیا ہے۔ یہ میچ قذافی اسٹیڈیم لاہور میں کھیلا جا رہا ہے۔

پہلے میچ میں پاکستان نے بہترین کھیل کا مظاہرہ کرتے ہوئے بنگلہ دیش کو 37 رنز سے شکست دی تھی۔ اُس میچ میں کپتان سلمان علی آغا نے ذمہ دارانہ بلے بازی کرتے ہوئے نصف سنچری اسکور کی، جبکہ فاسٹ باؤلر حسن علی نے شاندار کارکردگی کا مظاہرہ کرتے ہوئے پانچ کھلاڑیوں کو پویلین واپس بھیجا۔

پاکستان نے پہلے میچ میں 202 رنز کا ہدف دیا تھا، جس کے تعاقب میں مہمان ٹیم 19.2 اوورز میں 164 رنز پر آل آؤٹ ہو گئی۔

قومی ٹیم آج کے میچ میں کامیابی حاصل کرکے سیریز میں فیصلہ کن برتری حاصل کرنے کی کوشش کرے گی، جبکہ بنگلہ دیشی ٹیم کم بیک کے لیے پرامید ہے۔