پاکستان کی فضائی حدود کی بندش بھارتی ایئرلائنز کے لیے چیلنج بن گئی

نئی دہلی : پاکستانی فضائی حدود کی بندش نے بھارتی ایئرلائنز کے آپریشنز کو پیچیدہ بنا دیا ہے، جس کی وجہ سے بھارتی ایئرلائنز نے ایئربس 320 طیاروں کو گراونڈ کرنے کا فیصلہ کیا ہے۔ ذرائع کے مطابق، اس بندش کے نتیجے میں دہلی سے کابل اور دہلی سے تاشقند کی پروازوں کا روٹ توسیع کے باعث زیادہ طویل ہو چکا ہے، جس کی وجہ سے اضافی ایندھن اور لاگت کی ضرورت پیش آ رہی ہے۔

پاکستانی فضائی حدود کی بندش نے بھارت کی دہلی/استنبول پروازوں پر بھی اثر ڈالا ہے، اور ان پروازوں کو دوحہ یا احمد آباد میں ایندھن بھرنے کی ضرورت ہے، جو ان پروازوں کے لیے اضافی وقت اور لاگت کا باعث بن رہا ہے۔ اس کے نتیجے میں بھارتی ایئرلائنز پروازوں کے روٹس اور آپریشنز میں تبدیلی کرنے پر مجبور ہیں تاکہ اضافی اخراجات کو کم کیا جا سکے۔

ذرائع کے مطابق، بھارتی ایئرلائنز اس وقت اپنی حکمت عملی پر نظر ثانی کر رہی ہیں اور اس صورتحال کا حل تلاش کرنے کی کوشش کر رہی ہیں تاکہ ایندھن کی بچت کی جا سکے اور پروازوں کی لاگت کو کم کیا جا سکے۔