طالبان رجیم افغانستان کو ایک اور تنازع کی طرف دھکیل رہا ہے،وزیردفاع

اسلام آباد :  وزیرِ دفاع خواجہ آصف نے کہا ہے کہ اگر حالات ایسا تقاضا کریں تو پاکستان افغان طالبان حکومت کو شکست دے کر دنیا کے لیے مثال قائم کر سکتا ہے۔ اُنھوں نے ایکس (سابقہ ٹویٹر) پر اپنے بیان میں استنبول مذاکرات کے نتیجہ خیز نہ ہونے اور طالبان کے متضاد بیانات پر تشویش ظاہر کی۔

خواجہ آصف کے بقول پاکستان نے برادر ممالک کی درخواست پر امن کے نام پر مذاکرات کی پیشکش کی، مگر طالبان کے بعض بیانات سے ایسا معلوم ہوتا ہے کہ اُن کے اندر انتشار اور فریب پن ہے۔ وزیرِ دفاع نے واضح کیا کہ طالبان کو مکمل خاتمے یا غاروں میں چھپنے پر مجبور کرنے کے لیے پوری طاقت استعمال کرنا لازم نہیں، تاہم ضرورت پڑی تو سخت کارروائی سے گریز نہیں کیا جائے گا۔

اُنہوں نے تورا بورا جیسے مقامات کا حوالہ دیتے ہوئے کہا کہ اگر طالبان لڑنے پر اڑے تو انہیں وہیں یا کہیں اور مؤثر طریقے سے شکست دی جا سکتی ہے۔ خواجہ آصف نے افسوس کا اظہار کیا کہ طالبان اپنی حکمرانی اور جنگی معیشت برقرار رکھنے کے لیے افغانستان کو ایک اور تنازعے میں دھکیل رہے ہیں، جس کے برا اثر عام افغان عوام پر پڑ رہا ہے۔

وزیرِ دفاع نے خبردار کیا کہ پاکستان اپنی سرزمین پر کسی بھی دہشت گردانہ یا خودکش حملے کو برداشت نہیں کرے گا اور کسی بھی مہم جوئی کا جواب سخت اور کڑا ہوگا۔ اُن کا کہنا تھا کہ طالبان اپنے انجام کا حساب رکھیں، کیونکہ پاکستان کے عزم اور صلاحیتوں کو آزمانا ان کے لیے مہنگا ثابت ہوگا۔