نیشنل گرڈ کمپنی نے 500 کے وی K2/K3 ٹرانسمیشن لائن مکمل کرلی

لاہور : نیشنل گرڈ کمپنی آف پاکستان (این جی سی) نے 500 کے وی K2/K3 ٹرانسمیشن لائن کی تعمیر مکمل کر کے اسے کامیابی سے انرجائز کر دیا ہے۔ یہ 102 کلومیٹر طویل ڈبل سرکٹ لائن کراچی کے قریب واقع K2 اور K3 نیوکلیئر پاور پلانٹس سے نیشنل گرڈ کو 2,200 میگاواٹ بجلی فراہم کرے گی۔

اس اہم منصوبے کی مجموعی لاگت 18.45 ارب روپے ہے اور یہ لائن موجودہ پورٹ قاسم - مٹیاری ٹرانسمیشن لائن سے منسلک کی گئی ہے۔ اس اقدام سے ملک کے پاور ٹرانسمیشن نیٹ ورک کی استعداد اور استحکام میں خاطر خواہ اضافہ ہوگا، خاص طور پر جنوبی پاکستان میں بجلی کی فراہمی کو مستحکم بنانے میں مدد ملے گی۔

منیجنگ ڈائریکٹر این جی سی انجینئر محمد شاہد نذیر نے کہا کہ اس کامیابی سے بجلی کے نظام میں تسلسل اور اعتماد بڑھے گا، اور یہ قومی ترقی میں ایک نمایاں سنگ میل ہے۔ انہوں نے تمام ٹیموں کی محنت اور تعاون کو سراہا جو اس منصوبے کے مکمل ہونے میں شامل تھیں۔

یہ منصوبہ وزارت توانائی (پاور ڈویژن) اور این جی سی کی مختلف شعبہ جات کی مشترکہ کوششوں کا نتیجہ ہے، جو ملک کی توانائی کی ضروریات کو پورا کرنے میں ایک اہم کردار ادا کرے گا۔