اسحاق ڈار کا غزہ میں اسرائیلی جارحیت پر شدید ردعمل

جدہ : نائب وزیراعظم اور وزیر خارجہ اسحاق ڈار نے غزہ میں اسرائیل کی جانب سے جنگ بندی کی خلاف ورزیوں کی سخت مذمت کی اور اسے ناقابل برداشت قرار دیا۔ او آئی سی کے اجلاس میں پاکستان کی نمائندگی کرتے ہوئے انہوں نے کہا کہ عرب اور اسلامی ممالک نے بھی غزہ میں جنگ بندی کی خلاف ورزیوں پر تشویش کا اظہار کیا ہے اور پاکستان اس صورتحال کو قبول نہیں کرتا۔

اسحاق ڈار نے کہا کہ او آئی سی کا امن، ترقی اور تعاون کے لیے اہم کردار ہے اور پاکستان اسرائیل کی جارحیت کو کسی بھی صورت میں تسلیم نہیں کرے گا۔ انہوں نے اسرائیل کے توسیع پسندانہ اقدامات کو مسلم دنیا کے لیے سنگین تشویش کا باعث قرار دیا اور کہا کہ یہ اقدامات قطعی طور پر ناقابل قبول ہیں۔

انہوں نے غزہ کی بحالی کے لیے فوری اقدامات کی ضرورت پر زور دیتے ہوئے کہا کہ جنگ بندی کی خلاف ورزیاں فوراً بند ہونی چاہئیں۔ اس کے ساتھ ساتھ اسحاق ڈار نے فلسطینی علاقوں میں اسرائیل کی غیر قانونی آبادکاری کو بھی مسترد کیا۔

پاکستان کے وزیر خارجہ نے یہ بھی کہا کہ پاکستان غزہ میں پائیدار جنگ بندی کے لیے اپنے برادر ممالک کے ساتھ مسلسل رابطے میں ہے اور آزاد اور خودمختار فلسطینی ریاست کے قیام کی حمایت کرتا ہے۔