پاکستان اور سعودی عرب کی مشترکہ فوجی مشقیں "البتار ٹو" کامیابی سے اختتام پذیر

راولپنڈی: پاکستان اور سعودی عرب کی مشترکہ فوجی مشقیں "البتار ٹو" 18 نومبر سے 26 نومبر تک انسداد دہشت گردی کے حوالے سے کامیابی سے مکمل ہو گئیں۔ یہ مشقیں دونوں ممالک کے درمیان دفاعی تعاون کو مزید مستحکم کرنے اور دہشت گردی کے خلاف مشترکہ حکمت عملی تیار کرنے کے لیے اہم موقع ثابت ہوئیں۔

مسلح افواج کے شعبہ تعلقات عامہ (آئی ایس پی آر) کے مطابق، اس مشق میں پاکستان کی اسپیشل سروسز گروپ (SSG) اور سعودی عرب کی آپریشنل ٹیموں نے حصہ لیا۔ ان مشقوں کا مقصد دونوں فوجوں کے درمیان ہم آہنگی اور آپریشنل صلاحیتوں کو بہتر بنانا تھا۔

اختتامی تقریب 26 نومبر کو سعودی عرب میں منعقد ہوئی، جس میں دونوں ممالک کی فوجی قیادت نے مشقوں کے دوران حاصل کی گئی مہارتوں اور تعاون کا جائزہ لیا۔ ان مشقوں نے دہشت گردی کے خلاف جنگ میں نئے طریقوں اور حکمت عملیوں کو فروغ دینے میں اہم کردار ادا کیا۔