پاک ایران تعلقات کو مضبوط بنانے کے لیے وزیراعظم کی ایرانی سپریم لیڈر سے ملاقات

تہران: وزیراعظم شہباز شریف نے ایران کے سپریم لیڈر آیت اللہ  خامنہ ای سے ملاقات کی، جس میں انہوں نے مسلم دنیا کی رہنمائی اور خطے کی سلامتی کے لیے ایران کے کردار کو سراہا۔ ملاقات کے دوران وزیراعظم نے کہا کہ امت مسلمہ آپ کی طرف رہنمائی اور سرپرستی کے لیے دیکھتی ہے۔

ملاقات میں وزیراعظم نے بھارت کی جارحیت کے خلاف ایران کی حمایت پر شکریہ ادا کیا اور کہا کہ پاکستان خطے میں امن قائم کرنے اور اقتصادی ترقی کے فروغ کے لیے پرعزم ہے۔ انہوں نے ایران کے ساتھ تعلقات کو مزید مستحکم بنانے کے اقدامات سے آگاہ کیا۔

ایرانی سپریم لیڈر نے وزیراعظم کی امن کی کوششوں کو قدر کی نگاہ سے دیکھا اور پاک ایران تعلقات کو مضبوط بنانے کے لیے اپنا عزم ظاہر کیا۔ انہوں نے پاکستانی عوام کی خوشحالی کے لیے دعائیں بھی کیں۔ وزیراعظم نے علامہ اقبال کی شاعری اور افکار کے لیے سپریم لیڈر کی لگن کو سراہتے ہوئے ان سے جلد پاکستان کے دورے کی دعوت دی۔