مضبوط معیشت سرکاری دفاتر میں نہیں، ریسرچ سے بنتی ہے: عاطف اکرام شیخ؛ ایف پی سی سی آئی کا حکومت کے لیے متبادل معاشی فریم ورک اور5سالہ پلان تیار

لاہور:ملک کی مقتدر تاجر برادری کی نمائندہ تنظیم ایف پی سی سی آئی (FPCCI) نے آئندہ بجٹ کے لیے روایتی طریقہ کار کو تبدیل کرتے ہوئے حکومت کو ایک جامع اور متبادل معاشی گائیڈ لائن دینے کا فیصلہ کیا ہے۔ لاہور میں منعقدہ پریس کانفرنس کے دوران تنظیم کے مرکزی عہدیداروں نے ملکی تاریخ میں پہلی بار ایک مکمل معاشی فریم ورک، شیڈو بجٹ اور 5سالہ ترقیاتی پروگرام کا اعلان کر دیا ہے۔

پریس کانفرنس سے خطاب کرتے ہوئے صدر ایف پی سی سی آئی عاطف اکرام شیخ نے واضح کیا کہ تاجر برادری حکومت کو محض سالانہ تجاویز پیش نہیں کر رہی بلکہ ایک مقتدر معاشی فریم ورک دے رہی ہے۔ انہوں نے کہا کہ اگرچہ ہم بجٹ سازی میں حکومت کے کردار کی قدر کرتے ہیں، لیکن اب وقت آگیا ہے کہ پالیسی میکرز ان زمینی سفارشات کو عملی جامہ پہنائیں۔ عاطف اکرام شیخ نے اصرار کیا کہ مضبوط معیشت سرکاری دفاتر میں بیٹھ کر نہیں بنتی بلکہ اس کے لیے گہری ریسرچ اور برآمدات میں اضافے کی ضرورت ہوتی ہے۔ ہمارا تیار کردہ یہ شیڈو معاشی سروے اور بجٹ ملکی معیشت کو درست سمت میں چلانے کے لیے ایک بہترین گائیڈ لائن ہے۔

اس موقع پر یونائیٹڈ بزنس گروپ کے پیٹرن انچیف ایس ایم تنویر نے میڈیا کو بتایا کہ ایف پی سی سی آئی کی تاریخ میں پہلی بار تاجر برادری محض کتابی باتیں کرنے کے بجائے معاشی مسائل کا حقیقی اور عملی حل دے رہی ہے۔ انہوں نے کہا کہ اس تاریخی فریم ورک کے تحت حکومت کو ایک جامع ٹیکس پالیسی، متبادل معاشی سروے اور ۵ سالہ ڈویلپمنٹ پلان سونپا جا رہا ہے، جس پر عمل درآمد کر کے ملکی معیشت کو طویل مدتی استحکام دیا جا سکتا ہے۔