لاہور اور گردونواح میں شدید مٹی کا طوفان، دن میں رات کا سماں، درخت جڑوں سے اکھڑ گئے

لاہور:لاہور اور اس کے نواحی علاقوں میں ہفتے کی سہ پہر اچانک شدید مٹی کا طوفان اُٹھا جس کے ساتھ تیز آندھی اور کالے بادلوں نے پورے شہر کو اپنی لپیٹ میں لے لیا۔ موسم کی اس اچانک تبدیلی سے شہر بھر میں دن کے وقت ہی اندھیرا چھا گیا، اور معمولاتِ زندگی متاثر ہو گئے۔

تیز ہواؤں نے کئی علاقوں میں درختوں کو جڑوں سے اکھاڑ دیا جبکہ بعض مقامات پر سائن بورڈز اور چھتوں کو نقصان پہنچا۔ محکمہ موسمیات کے مطابق ہوا کی رفتار 60 کلومیٹر فی گھنٹہ تک ریکارڈ کی گئی، اور آئندہ چند گھنٹوں میں بارش کا امکان بھی ظاہر کیا گیا ہے۔

شہریوں کو گرد و غبار، بجلی کی بندش اور کم روشنی کے باعث سخت مشکلات کا سامنا کرنا پڑا۔ مختلف علاقوں میں بجلی کی فراہمی معطل ہو گئی جبکہ ٹریفک کی روانی متاثر ہوئی۔

انتظامیہ اور محکمہ موسمیات نے شہریوں کو ہدایت کی ہے کہ وہ گھروں میں رہیں، غیر ضروری سفر سے گریز کریں اور درختوں یا بجلی کے کھمبوں جیسے خطرناک مقامات سے دور رہیں۔