سیما سجدیہہ نے سہیل خان سے علیحدگی کی اصل وجوہات پر پردہ اٹھا دیا

ممبئی: اداکار سہیل خان سے اپنی شادی ختم ہونے کے کئی سال بعد، سیما سجدیہہ نے علیحدگی کی اصل وجوہات اور اس کے بعد اپنی زندگی میں ہونے والی تبدیلیوں پر پہلی مرتبہ کھل کر بات کی ہے۔ 1998 میں شادی کرنے والے اس جوڑے نے 2022 میں اپنی راہیں جدا کرلیں۔ ان کے دو بیٹے، نیروان اور یوہان ہیں، جن کی پرورش دونوں مشترکہ طور پر کر رہے ہیں۔

ایک انٹرویو میں سیما نے ماضی پر نظر ڈالتے ہوئے کہا کہ جب ان کی شادی ہوئی تھی، تو وہ اور سہیل دونوں بہت کم عمر تھے اور اس وقت انہیں یہ پوری طرح سے سمجھ نہیں آیا کہ زندگی اور انسان کس طرح وقت کے ساتھ بدلتے ہیں۔ "ہماری شادی کے وقت ہم دونوں بہت کم عمر تھے۔ میں صرف 22 سال کی تھی۔ جیسے جیسے ہم بڑے ہوئے، ہم دونوں مختلف سمتوں میں بڑھنے لگے۔ آخرکار یہ سمجھ آیا کہ ہم میاں بیوی کی نسبت ایک دوسرے کے اچھے دوست ہیں،" سیما نے کہا۔

سیما نے مزید وضاحت دی کہ علیحدگی کا فیصلہ جلدبازی میں نہیں بلکہ بہت سوچ بچار کے بعد کیا گیا تھا۔ "ہمارے درمیان روزانہ کی لڑائیاں اور ناخوشگوار ماحول سے بہتر تھا کہ ہم ایک دوسرے سے الگ ہو جائیں۔ ہم گھر کا سکون بچانے کی کوشش کر رہے تھے،" سیما نے بیان کیا۔

انہوں نے کہا کہ "کسی بھی عورت کا طلاق کا خواب نہیں ہوتا، نہ ہی وہ اپنے اوپر اس بوجھ کو مسلط کرتی ہے۔ میں شدید ذہنی دباؤ کا شکار ہو گئی تھی اور یقیناً میرے بچے بھی اس سے متاثر ہوئے ہوں گے۔ یہ فیصلہ کرنے میں ہمیں کئی سال لگے، خاص طور پر ہم بچوں کے لیے صحیح وقت کا انتظار کر رہے تھے۔"

جب سیما سے پوچھا گیا کہ فیصلہ آخرکار کس نے کیا، تو انہوں نے کہا کہ اس میں کسی پر الزام نہیں تھا اور یہ دونوں کا مشترکہ فیصلہ تھا۔

طلاق کے بعد کی زندگی کے بارے میں سیما نے بتایا کہ سب سے بڑا چیلنج عملی طور پر خودمختار بننا تھا۔ انہیں مالی معاملات، انشورنس اور دیگر ضروریات کے بارے میں نیا سیکھنا پڑا۔

سیما اس وقت وکرم آہوجا کے ساتھ تعلق میں ہیں، جن سے وہ سہیل خان سے شادی کرنے سے پہلے منگنی کر چکی تھیں۔