ایرانی وزیر خارجہ کا فیلڈ مارشل اور نائب وزیراعظم سے رابطہ، خطے میں کشیدگی کم کرنے پر اتفاق؛اعلامیہ دفترِ خارجہ

اسلام آباد : ترجمان دفترِ خارجہ نے ایران اور پاکستان کی قیادت کے درمیان ہونے والے اعلیٰ سطح کے ٹیلیفونک رابطوں کی تفصیلات جاری کر دی ہیں۔ اعلامیے کے مطابق ایرانی وزیر خارجہ عباس عراقچی نے پاکستان کی سیاسی و عسکری قیادت سے اہم مشاورت کی، جس میں علاقائی سلامتی کے چیلنجز پر غور کیا گیا۔
ترجمان دفترِ خارجہ کے مطابق ایرانی وزیر خارجہ نے نائب وزیراعظم اسحاق ڈار اور فیلڈ مارشل سید عاصم منیر سے گفتگو میں مشرقِ وسطیٰ کی تازہ ترین صورتحال کو زیرِ بحث لایا۔ دونوں ممالک نے خطے میں جاری تشدد پر تشویش کا اظہار کرتے ہوئے فوری جنگ بندی کی ضرورت پر زور دیا اور امن و استحکام کے لیے مل کر کام کرنے کے عزم کا اعادہ کیا۔
اعلامیے میں مزید بتایا گیا کہ ایرانی وزیر خارجہ نے خطے میں تناؤ کم کرنے کے حوالے سے پاکستان کے متحرک سفارتی کردار کو خاص طور پر سراہا۔ انہوں نے پاکستان کی ثالثی کی مخلصانہ کوششوں کی تعریف کرتے ہوئے اسے خطے کی ضرورت قرار دیا۔ ایرانی وزیر خارجہ نے فیلڈ مارشل اور نائب وزیراعظم سے علیحدہ علیحدہ رابطے کر کے ایران کا نقطہ نظر پیش کیا۔
 تہران اور اسلام آباد نے اتفاق کیا کہ علاقائی امن کے لیے دوطرفہ تعاون کو ہر سطح پر بڑھایا جائے گا۔ مستقبل میں بھی عسکری اور سفارتی سطح پر رابطے جاری رکھنے کا فیصلہ کیا گیا ہے تاکہ کسی بھی ہنگامی صورتحال میں مشترکہ حکمتِ عملی اپنائی جا سکے۔