کے پی میں وزارتیں فروخت ہو رہی ہیں، عید پر مخصوص مقامات کے سوا منڈی لگانے پر پابندی،عظمیٰ بخاری

لاہور:وزیرِ اطلاعات پنجاب عظمیٰ بخاری نے نیوز کانفرنس کرتے ہوئے واضح کیا ہے کہ وزیراعلیٰ مریم نواز کے فلیگ شپ پروگرام 'ستھرا پنجاب' کے تحت عیدالاضحیٰ پر صوبے بھر میں صفائی کے انتظامات کو ہر قیمت پر یقینی بنایا جائے گا۔ انہوں نے دوٹوک انداز میں کہا کہ مخصوص مقامات کے علاوہ کہیں اور مویشی منڈی لگانے کی قطعی اجازت نہیں ہوگی، اور منڈیوں میں بیوپاریوں کو تمام سہولیات فراہم کر دی گئی ہیں۔ عظمیٰ بخاری کا کہنا تھا کہ شہر میں جگہ جگہ گندگی پھیلانا ناقابلِ قبول ہے اور ایسا کرنے والوں کو بھاری جرمانہ کیا جائے گا۔
پریس کانفرنس کے دوران وزیرِ اطلاعات نے میڈیا نمائندوں کو بتایا کہ لاہور کی صحافی کالونی فیز ٹو کے معاملے پر بنائی گئی سکروٹنی کمیٹی نے اپنا کام مکمل کر لیا ہے۔ انہوں نے یقین دہانی کرائی کہ حکومتِ پنجاب بہت جلد صحافی برادری کو فیز ٹو کے حوالے سے بڑی خوشخبری سنائے گی۔
خیبر پختونخوا کی موجودہ صورتحال پر بات کرتے ہوئے عظمیٰ بخاری نے سنگین الزامات عائد کیے کہ کے پی سے آنے والی کرپشن کی داستانیں ایک حقیقت ہیں اور وہاں پیسوں کے عوض وزارتیں بانٹی جا رہی ہیں۔ انہوں نے پی ٹی آئی قیادت کو نشانہ بناتے ہوئے کہا کہ جو بھی ان کے حق میں نہ بولے اس سے بدتمیزی کرنا اس پارٹی کا باقاعدہ مائنڈ سیٹ بن چکا ہے۔