کراچی میں دہشت گردی کی بڑی سازش ناکام، ریلوے ٹریک کو نشانہ بنانے والے 5 دہشت گرد گرفتار

کراچی :سندھ پولیس کے محکمہ انسدادِ دہشت گردی (CTD) نے شہرِ قائد کو بڑی تباہی سے بچاتے ہوئے ریلوے نیٹ ورک پر حملے کا خطرناک منصوبہ ناکام بنا دیا ہے۔ گزشتہ رات ایک انٹیلی جنس بیسڈ آپریشن کے دوران کالعدم تنظیم کے 5 کارندوں کو رنگے ہاتھوں گرفتار کر لیا گیا۔
 حکام کے مطابق گرفتار شدگان کا تعلق بھارتی سرپرستی میں چلنے والی تنظیم 'بلوچستان ری پبلکن گارڈز' (BRG) سے ہے۔کارروائی کے دوران ملزمان کے ٹھکانے سے بڑی مقدار میں بارودی مواد، ڈیٹونیٹرز، خودکار اسلحہ اور اہم تنصیبات کے نقشے برآمد ہوئے ہیں۔ دہشت گردوں کا ارادہ ریلوے ٹریک پر آئی ای ڈی (IED) نصب کر کے مسافر ٹرینوں کو نشانہ بنانا تھا۔
سی ٹی ڈی ترجمان کا کہنا ہے کہ ان دہشت گردوں کو سرحد پار سے ہدایات مل رہی تھیں اور ان کا مقصد کراچی کے امن و امان کو سبوتاژ کرنا تھا۔ بروقت کارروائی نے نہ صرف سینکڑوں قیمتی جانیں بچا لیں بلکہ ریلوے کے نظام کو مفلوج ہونے سے بھی روک لیا۔
گرفتار ملزمان کو نامعلوم مقام پر منتقل کر دیا گیا ہے جہاں ان سے نیٹ ورک کے دیگر سہولت کاروں کے بارے میں تفتیش کی جا رہی ہے۔