این اے 143، 185 اور پی پی 203 میں ضمنی انتخابات کا ٹائم ٹیبل جاری

اسلام آباد: الیکشن کمیشن آف پاکستان نے این اے 143 ساہیوال، این اے 185 ڈیرہ غازی خان اور پی پی 203 میں ضمنی انتخابات کا نیا ٹائم ٹیبل جاری کر دیا ہے۔

اس شیڈول کے تحت 26 اگست کو ریٹرننگ افسر کی طرف سے عوامی اطلاع جاری کی جائے گی، جبکہ کاغذات نامزدگی جمع کروانے کی آخری تاریخ 30 اگست مقرر کی گئی ہے۔ اسی دن امیدواروں کے نام بھی عوام کے سامنے لائے جائیں گے۔

اسکروٹنی کا مرحلہ 3 ستمبر تک مکمل کیا جائے گا اور کاغذات نامزدگی کے مسترد یا منظور کیے جانے کے خلاف اپیلیں 8 ستمبر تک جمع کرائی جا سکیں گی۔ اپیلوں پر فیصلہ 12 ستمبر کو سنایا جائے گا۔

امیدواروں کی حتمی فہرست 13 ستمبر کو شائع کی جائے گی، جب کہ کاغذات واپس لینے اور نظر ثانی شدہ فہرست کی اشاعت کی آخری تاریخ 15 ستمبر ہوگی۔ انتخابی نشانات 16 ستمبر کو جاری کیے جائیں گے۔

ضمنی انتخابات کے لیے پولنگ کا دن 5 اکتوبر، بروز اتوار مقرر کیا گیا ہے۔ یہ نشستیں نااہلی کی وجہ سے خالی ہوئی تھیں۔

ادھر، سعودی عرب نے خیبرپختونخوا میں سیلاب متاثرین کی مدد کے لیے امدادی سامان فراہم کیا ہے، جبکہ کراچی میں موسلا دھار بارش کے باعث 815 فیڈرز بند ہو گئے ہیں۔