وزیراعلیٰ پنجاب مریم نواز کا سیلاب متاثرین کے لیے فوری امدادی اقدامات کا اعلان

لاہور : وزیراعلیٰ پنجاب مریم نواز شریف کی زیر صدارت ایک خصوصی اجلاس ہوا جس میں سیلاب سے متاثرہ افراد کے نقصان کا ازالہ کرنے اور بحالی کے لیے فوری کارروائی کا فیصلہ کیا گیا ہے۔

اجلاس میں بتایا گیا کہ ضلع اور تحصیل کی سطح پر فلڈ ریلیف کمیٹیاں بنائی جائیں گی تاکہ متاثرین کو آسانی سے مدد پہنچائی جا سکے۔ مریم نواز نے کہا کہ متاثرین کے لیے ایک سروے فارم، موبائل ایپ اور نگرانی کے لیے ڈیش بورڈ بنایا جائے گا، جس کی وہ خود نگرانی کریں گی۔

ریونیو ڈیپارٹمنٹ کی رپورٹ کے مطابق پنجاب کے 27 اضلاع اور 64 تحصیلوں میں 3,775 گاؤں سیلاب سے متاثر ہوئے ہیں، جن میں لاکھوں مکانات نقصان کا شکار ہوئے ہیں۔

اجلاس میں یہ بھی فیصلہ کیا گیا کہ سڑکیں، پل اور دیگر ضروری انفراسٹرکچر جلد از جلد ٹھیک کیے جائیں گے۔ اس کام میں مختلف محکموں اور فوج کے نمائندے شامل ہوں گے۔

وزیراعلیٰ نے ہدایت دی کہ امدادی کیمپ زیادہ سے زیادہ قائم کیے جائیں اور ہر متاثرہ شخص تک مدد پہنچائی جائے تاکہ کوئی بھی ریلیف سے محروم نہ رہے۔