امریکی صدر ٹرمپ کا فلسطین کی ریاستی حیثیت پر برطانوی وزیراعظم سے اختلاف

لندن: امریکی صدر ڈونلڈ ٹرمپ نے برطانیہ کے دورے کے دوران کہا ہے کہ فلسطین کی ریاست کے طور پر شناخت کا معاملہ امن کے مکمل منصوبے کے تناظر میں دیکھا جانا چاہیے۔ انہوں نے برطانوی وزیر اعظم کیئر اسٹارمر کے اس حوالے سے موقف سے اختلاف کا اظہار کیا ہے۔

صدر ٹرمپ نے کہا کہ فلسطین کو ریاست تسلیم کرنے سے قبل تمام متعلقہ فریقین کے مفادات کو مدنظر رکھ کر ایک جامع امن منصوبہ تیار ہونا چاہیے۔ انہوں نے اس موقع پر امریکہ اور برطانیہ کے گہرے تعلقات اور دفاع، تجارت اور ٹیکنالوجی میں تعاون کو بھی سراہا۔

دونوں رہنماؤں نے یوکرین کی جنگ اور غزہ کی کشیدگی پر بھی تبادلہ خیال کیا۔ کیئر اسٹارمر نے کہا کہ غزہ میں جاری تصادم فوری طور پر روکنا ضروری ہے اور یرغمالیوں کی جلد از جلد رہائی ہونی چاہیے۔

صدر ٹرمپ نے روسی صدر ولادیمیر پیوٹن سے مایوسی کا اظہار کرتے ہوئے کہا کہ یوکرین کا تنازع پہلے سے زیادہ پیچیدہ ہو گیا ہے، تاہم مذاکرات کے ذریعے حل تلاش کیا جا سکتا ہے۔ انہوں نے اسرائیل اور غزہ کے مسئلے کو بھی مشکل قرار دیا مگر امن کے قیام کی امید ظاہر کی۔