آزاد جموں و کشمیر کا 310 ارب روپے کا ٹیکس فری بجٹ آج پیش ہوگا

کوٹلی :آزاد جموں و کشمیر کی حکومت نے مالی سال 2025-26 کے لیے 310 ارب 20 کروڑ روپے کا ٹیکس فری بجٹ تیار کیا ہے، جو آج وزیر خزانہ عبد الماجد خان اسمبلی میں پیش کریں گے۔

یہ بجٹ گزشتہ سال کے مقابلے میں تقریباً 30 فیصد زیادہ ہے، جس میں 49 ارب روپے ترقیاتی کاموں کے لیے اور 261 ارب روپے دوسرے اخراجات کے لیے رکھے گئے ہیں۔ یہ اضافہ آزاد کشمیر کی تاریخ میں سب سے بڑا سمجھا جا رہا ہے۔

صحت کے شعبے میں بہتری کے لیے 6 ارب روپے صحت کارڈ سکیم کی بحالی کے لیے دیے گئے ہیں، تاکہ عام لوگ بہتر علاج کروا سکیں۔ سرکاری ہسپتالوں میں مفت ادویات کے لیے بھی ڈیڑھ ارب روپے اضافی رکھے گئے ہیں۔

حکومت نے سرکاری ملازمین اور پنشنرز کی تنخواہوں میں 10 فیصد اضافے کی تجویز دی ہے۔ تعلیم کے لیے 3 ارب روپے اور پن بجلی کی پیداوار بڑھانے کے لیے ایک ارب روپے سے زیادہ مختص کیے گئے ہیں۔

گزشتہ مالی سال میں حکومت نے 75 ارب روپے کا ٹیکس جمع کرنے کا ہدف رکھا تھا، جس میں سے 69 ارب روپے حاصل کیے جا چکے ہیں، جسے اچھی کارکردگی سمجھا جا رہا ہے۔

نیا بجٹ عوام کی سہولت اور فلاح کے لیے بنایا گیا ہے، جس میں صحت، تعلیم اور بنیادی سہولیات کو سب سے زیادہ ترجیح دی گئی ہے۔