وزیراعظم شہباز شریف نے حلال گوشت کی برآمدی پالیسی کی منظوری دے دی

اسلام آباد : وزیراعظم محمد شہباز شریف نے پاکستان کی حلال گوشت کی برآمدی پالیسی کی منظوری دے دی ہے تاکہ ملک کی حلال گوشت کی مارکیٹ کو عالمی سطح پر مضبوط کیا جا سکے۔ وزیراعظم کی زیر صدارت ایک اہم اجلاس میں حلال گوشت کی برآمدی حکمت عملی پر تفصیلی غور کیا گیا۔

وزیراعظم نے ہدایت کی کہ آئندہ دو ہفتوں میں حلال گوشت کی برآمد بڑھانے کے لیے تین سالہ ایک جامع حکمت عملی تیار کی جائے جس میں تمام متعلقہ وزارتوں اور صوبائی حکومتوں کی مکمل ہم آہنگی ہو۔ ان کا کہنا تھا کہ پاکستان کو مسلم ممالک اور عالمی سطح پر حلال گوشت کی مارکیٹ میں اپنا حصہ بڑھانے کے لیے اس حکمت عملی پر فوراً عمل درآمد کرنا ضروری ہے۔

وزیراعظم نے اس بات پر زور دیا کہ حلال گوشت کی پیداوار، کولڈ سٹوریج اور دیگر ضروری انفراسٹرکچر کو عالمی معیار کے مطابق بہتر بنایا جائے تاکہ پاکستان کا برآمدی حصہ بڑھ سکے۔ انہوں نے کہا کہ پاکستان کی حلال گوشت کی پیداوار کو عالمی سطح پر مسابقتی بنانے کے لیے فوری اقدامات کیے جائیں گے۔

شہباز شریف نے مزید کہا کہ نہ صرف مسلم ممالک بلکہ حلال گوشت کی عالمی مارکیٹ میں بھی پاکستان کے لیے بے شمار مواقع ہیں، اور حکومت اس بات کو یقینی بنائے گی کہ پاکستان میں موجود ذبیح خانوں کو عالمی معیار کی سرٹیفکیشن ملے اور دوسرے ممالک کے ساتھ دو طرفہ رجسٹریشن کے عمل میں مدد فراہم کی جائے۔

انہوں نے یہ بھی ہدایت کی کہ ملک میں موجود ذبیح خانوں کو بیماری سے پاک کرنے اور عالمی معیار کی صفائی ستھرائی کے انتظامات کو یقینی بنانے کے لیے خصوصی اقدامات کیے جائیں۔ اس کے ساتھ ساتھ حلال گوشت کی برآمد میں اضافے کے لیے اس شعبے کی لاگت کو کم سے کم کرنے پر بھی توجہ دی جائے گی۔

اجلاس میں بتایا گیا کہ پاکستان کی حلال گوشت کی سالانہ پیداوار 6 ملین میٹرک ٹن ہے اور مقامی ضرورت پوری کرنے کے بعد اس کا ایک بڑا حصہ برآمد کیا جا سکتا ہے۔ اس کے علاوہ، حلال گوشت کی پیداوار بڑھانے اور عالمی معیار کی پیکجنگ کے لیے بھی اقدامات اٹھائے جا رہے ہیں۔

وزیراعظم نے اس عزم کا اظہار کیا کہ پاکستان کی حلال گوشت کی برآمدات کو بڑھانے کے لیے عالمی سطح پر تسلیم شدہ بہترین بزنس ماڈلز سے فائدہ اٹھایا جائے گا تاکہ ملک کی اقتصادی ترقی میں حصہ ڈالا جا سکے۔