آزاد کشمیر کے سیاسی منظر نامے میں پیپلز پارٹی کے مضبوط امیدوار  ،فیصل ممتاز راٹھور کون ہیں؟

مظفرآباد: پیپلز پارٹی نے فیصل ممتاز راٹھور کو آزاد جموں و کشمیر کی وزارتِ عظمیٰ کے لیے نامزد کر دیا ہے۔ راولپنڈی میں 11 اپریل 1978 کو پیدا ہونے والے فیصل ممتاز راٹھور اس وقت آزاد کشمیر کی قانون ساز اسمبلی کے رکن اور پیپلز پارٹی آزاد کشمیر کے سیکریٹری جنرل کے طور پر سیاسی منظرنامے میں اہم مقام رکھتے ہیں۔ ان کی نامزدگی مضبوط سیاسی پس منظر، عملی حکمرانی اور عوامی مقبولیت کا نتیجہ ہے۔

فیصل ممتاز راٹھور ایک معروف سیاسی خاندان سے تعلق رکھتے ہیں، جہاں ان کے والد نے وزیراعظم، اسپیکر، اپوزیشن لیڈر اور سینئر وزیر کے عہدے سنبھالے۔ راٹھور خاندان پیپلز پارٹی آزاد کشمیر کے بانیوں میں شامل ہے، جس کی وجہ سے فیصل ممتاز راٹھور کو کشمیر کاز اور پاکستان اے جے کے تعلقات کی گہری سمجھ حاصل ہے۔

انہوں نے متعدد مرتبہ قانون ساز اسمبلی کے رکن کے طور پر عوامی اعتماد حاصل کیا اور وزیرِ بجلی اور وزیرِ بلدیات و دیہی ترقی کے اہم منصب پر خدمات انجام دی ہیں، جس سے انہیں گورننس اور ترقیاتی منصوبوں کے عملی تجربے کا موقع ملا۔ اپوزیشن کی مکمل مدت گزارنے کا تجربہ بھی انہیں پالیسی سازی اور حکومتی احتساب کے نظام کی بہتر سمجھ فراہم کرتا ہے۔

2017 سے پیپلز پارٹی آزاد کشمیر کے سیکریٹری جنرل کی حیثیت سے فیصل ممتاز راٹھور پارٹی کی تنظیمی اور سیاسی سرگرمیوں میں کلیدی کردار ادا کر رہے ہیں۔ مرکزی قیادت، خاص طور پر بلاول بھٹو زرداری اور فریال تالپور، ان پر مکمل اعتماد رکھتے ہیں۔ ان کا شائستہ اور غیر متنازع انداز انہیں سیاسی اور عوامی حلقوں میں قابلِ اعتماد بناتا ہے۔

حالیہ طور پر انہیں عوامی ایکشن کمیٹی کے ساتھ مذاکراتی کمیٹی کا سربراہ مقرر کیا گیا، جو ان کی مصالحتی صلاحیتوں کا اعتراف ہے۔ علاوہ ازیں، نجی ٹی وی پر پروگرام کی میزبانی نے ان کی عوامی رابطہ کاری اور میڈیا ہینڈلنگ کی مہارت کو بھی مزید اجاگر کیا ہے۔

فیصل ممتاز راٹھور کو ان کی مضبوط قائدانہ صلاحیتوں، تجربہ کاری اور متوازن طرزِ سیاست کی بنیاد پر آزاد کشمیر کے اگلے وزیرِاعظم کے لیے ایک موزوں اور قابل اعتماد امیدوار سمجھا جا رہا ہے۔