جعفر ایکسپریس پر حملہ: وزرائے اعلیٰ اور گورنرز کی مذمت، دہشت گردوں کے خلاف سخت کارروائی کا عزم

لاہور: جعفر ایکسپریس پر حملے کی شدید مذمت کی گئی ہے۔ پاکستان کے مختلف صوبوں کے وزرائے اعلیٰ اور گورنرز نے اس حملے کو دہشت گردی کی سنگین کارروائی قرار دیتے ہوئے فوری اور سخت اقدامات کرنے کا مطالبہ کیا۔

وزیراعلیٰ بلوچستان سرفراز بگٹی نے اس حملے کو بزدلانہ عمل قرار دیا اور کہا کہ دہشت گردوں کو سخت سزا دی جائے گی تاکہ آئندہ ایسی کارروائیاں نہ ہوں۔ ان کا کہنا تھا کہ بلوچستان میں دہشت گردوں کا کوئی مستقبل نہیں ہے۔

وزیراعلیٰ پنجاب مریم نواز نے بھی اس حملے کی شدید مذمت کی اور کہا کہ انسانی زندگیوں پر حملہ کرنا ہر لحاظ سے غلط ہے۔ انہوں نے ہر زخمی کی جلد صحتیابی کے لیے دعا کی۔

وزیراعلیٰ خیبرپختونخوا علی امین گنڈا پور نے کہا کہ دہشت گردوں کا یہ حملہ نہایت بزدلانہ ہے اور ان کے خلاف بلا تفریق کارروائی کی جائے گی۔ وزیراعلیٰ سندھ مراد علی شاہ نے کہا کہ دہشت گردی کے خلاف پاکستانی عوام کا عزم مزید پختہ ہوا ہے۔