نئی دہلی — کانگریس کی جنرل سیکریٹری پریانکا گاندھی نے غزہ میں اسرائیل کی جانب سے جاری حملوں اور وہاں انسانی جانوں کے ضیاع پر گہری تشویش کا اظہار کیا ہے۔ سوشل میڈیا پر اپنے بیان میں انہوں نے کہا کہ اسرائیلی حملوں میں اب تک 60 ہزار سے زائد افراد ہلاک ہو چکے ہیں جن میں 18 ہزار سے زیادہ بچے شامل ہیں۔
پریانکا نے کہا کہ اسرائیل کی پابندیوں اور بمباری کی وجہ سے وہاں خوراک کی شدید کمی ہے جس سے خاص طور پر بچوں کی جانیں خطرے میں ہیں۔ انہوں نے بھارتی حکومت کی اس حوالے سے خاموشی کو نہایت افسوسناک قرار دیا اور کہا کہ اس خاموشی کو جرم سمجھنا چاہیے کیونکہ غزہ میں جاری تباہ کاری کو روکنا انسانی ذمہ داری ہے۔
انہوں نے الجزیرہ کے پانچ صحافیوں کی ہلاکت کو بھی اسرائیل کی جانب سے ایک ظلم قرار دیتے ہوئے کہا کہ ان صحافیوں نے ہمیں سچائی کی طاقت دکھائی اور ان کی قربانی کو یاد رکھنا چاہیے۔
پریانکا گاندھی کا کہنا تھا کہ حق کے لیے کھڑے ہونے والوں کا حوصلہ کبھی کم نہیں ہوگا اور اسرائیلی مظالم کے باوجود سچ کی آواز ہمیشہ بلند رہے گی۔
NaiBaat | Copyright © 2026
