کراچی میں بارش کا سلسلہ جاری، کئی علاقوں میں پانی جمع، ٹریفک متاثر

کراچی : شہر قائد کے مختلف علاقوں میں آج صبح سے بارش کا سلسلہ شروع ہو گیا ہے، جو کہیں ہلکی اور کہیں تیز ہو رہی ہے۔ اس کے باعث کئی نشیبی علاقوں میں پانی جمع ہو گیا ہے اور اہم سڑکوں پر ٹریفک کی رفتار بھی سست ہو گئی ہے۔

گارڈن، تین ہٹی، نشتر روڈ اور لسبیلہ میں ہلکی بارش جاری ہے۔ بارش کی وجہ سے کورنگی ندی اور کازوے کی سڑکیں بند کر دی گئی ہیں کیونکہ وہاں پانی کی سطح بڑھ چکی ہے اور سڑکیں نقصان کا شکار ہو سکتی ہیں۔

کازوے روڈ کے کئی حصے پانی کے بہاؤ کے ساتھ بہہ گئے ہیں اور کچھ جگہیں دھنس بھی چکی ہیں، جس کی وجہ سے ٹریفک کو متبادل راستوں پر منتقل کیا جا رہا ہے۔

انتظامیہ نے حفاظتی اقدامات کے طور پر پولیس اہلکار کازوے اور کورنگی ندی کے داخلی راستوں پر تعینات کر دیے ہیں تاکہ شہری محفوظ رہیں اور متاثرہ راستوں پر نہ جائیں۔