انوشکا شرما کی فلم "چکڑا ایکسپریس" جلد نیٹ فلیکس پر ریلیز ہو گی

ممبئی : بالی ووڈ کی معروف اداکارہ انوشکا شرما تقریباً سات سال کے وقفے کے بعد دوبارہ سکرین پر نظر آئیں گی، مگر اس بار وہ سینما ہالز میں نہیں، بلکہ نیٹ فلیکس پر اپنی نئی فلم "چکڑا ایکسپریس" کے ساتھ واپس آ رہی ہیں۔

یہ فلم ایک سپورٹس بائیوگرافی ہے، جس میں انوشکا شرما بھارتی کرکٹر جھلن گوسوامی کا کردار نبھا رہی ہیں۔ جھلن گوسوامی نے 2002 سے 2022 تک بھارتی خواتین کرکٹ ٹیم کی نمائندگی کی اور ان کا تعلق مغربی بنگال کے چھوٹے شہر "چکڑا" سے تھا، اسی شہر کی مناسبت سے اس فلم کا نام "چکڑا ایکسپریس" رکھا گیا ہے۔

فلم کی شوٹنگ مکمل ہو چکی تھی، لیکن کچھ پروڈکشن اور پوسٹ پروڈکشن مسائل کی وجہ سے اس کی ریلیز میں تاخیر ہوئی۔ نیٹ فلیکس اور پروڈکشن کمپنی کے درمیان خاص طور پر فلم کے اختتامی حصے پر کچھ اختلافات تھے، لیکن اب دونوں کے درمیان معاملات حل ہو چکے ہیں اور فلم کی ریلیز جلد متوقع ہے۔

اگرچہ اس فلم کو ابتدائی طور پر 2024 میں ریلیز کیا جانا تھا، مگر پروڈکشن کمپنی اور نیٹ فلیکس کے درمیان اختلافات کی وجہ سے اس میں تاخیر ہوئی۔ اب یہ واضح ہو چکا ہے کہ "چکڑا ایکسپریس" نیٹ فلیکس پر جلد ہی ریلیز کی جائے گی اور انوشکا شرما کے مداح ان کی واپسی کا بے صبری سے انتظار کر رہے ہیں۔