گلوبل وارمنگ ، خطرے سے آگے نئے مسائل 

زمین کا درجہ حرارت ایک طویل عرصے سے آہستہ آہستہ بڑھ رہا ہے لیکن گزشتہ چند دہائیوں میں یہ عمل خطرناک حد تک تیز ہو چکا ہے۔ گلوبل وارمنگ اور موسمیاتی تبدیلیوں کا بحران اب محض سائنسی مکالموں، بین الاقوامی کانفرنسوں یا مستقبل کی ممکنہ دستک تک محدود نہیں رہا بلکہ یہ اکیسویں صدی کا وہ تلخ ترین سچ بن چکا ہے جس نے پوری انسانی تہذیب کے وجود کو گھیر رکھا ہے۔ زمین کے درجہ حرارت میں مسلسل اور بتدریج ہونے والا اضافہ گزشتہ چند دہائیوں کے دوران جس غیر معمولی اور ہولناک رفتار سے تیز ہوا ہے اس نے کرہ ارض کے تمام جانداروں اور قدرتی نظاموں کے لیے بقا کا سوال کھڑا کر دیا ہے۔ دنیا بھر کے نامور ماہرین ارضیات، ممتاز ماحولیاتی سائنسدانوں اور اقوام متحدہ جیسے معتبر بین الاقوامی اداروں نے اب قطعی طور پر اس حقیقت پر مہر تصدیق ثبت کر دی ہے کہ عالمی درجہ حرارت میں یہ خطرناک بگاڑ کسی قدرتی سائیکل کا حصہ نہیں بلکہ خالصتاً انسانی سرگرمیوں، بے ہنگم صنعتی ترقی اور فطرت کے قوانین سے کھلی بغاوت کا شاخسانہ ہے۔ انسان نے اپنے مادی آرام اور معاشی برتری کی اندھی دوڑ میں کرہ ارض کی گیسوں کے توازن کو اس حد تک بگاڑ دیا ہے کہ اب خود اس کے اپنے پاو¿ں تلے سے زمین سرکنے لگی ہے۔
اس سنگین ماحولیاتی تباہی کے اسباب پر نظر دوڑائی جائے تو صنعتی انقلاب کے بعد کی تاریخ انسانی غفلتوں کا ایک طویل بیانیہ نظر آتی ہے۔ کارخانوں، بجلی کے پیداواری مراکز، ہوائی و زمینی ٹریفک اور شہروں کو روشن رکھنے کے لیے فوسل فیولز یعنی کوئلے، تیل اور گیس کا بے دریغ استعمال کیا گیا، جس کے نتیجے میں کاربن ڈائی آکسائیڈ، میتھین اور دیگر زہریلی گرین ہاو¿س گیسوں کا ایک ایسا دبیز غلاف زمین کے گرد بن چکا ہے جو سورج کی حرارت کو واپس خلا میں جانے سے روک دیتا ہے۔ اس عمل نے زمین کو ایک ایسے بند شیشے کے گھر یعنی گرین ہاو¿س میں تبدیل کر دیا ہے جہاں حبس اور گرمی مسلسل بڑھتی جا رہی ہے۔ جنگلات کی بے رحمانہ کٹائی نے 
اس جلتی پر مزید تیل کا کام کیا ہے کیونکہ درخت ہی وہ واحد قدرتی ذریعہ تھے جو کاربن کو اپنے اندر جذب کر کے ماحول کو صاف رکھتے تھے لیکن انسان نے عمارتی مقاصد اور شہری پھیلاو¿ کے لیے زمین کے ان پھیپھڑوں کو نوچ ڈالا، جس کے بعد فضا میں زہریلی گیسوں کا تناسب برقرار رکھنا ناممکن ہو گیا ہے۔
سطح زمین کا درجہ حرارت بڑھنے کے باعث برفانی تودے تیزی سے پگھل رہے ہیں، قطبین کی برف سکڑ رہی ہے اور سمندری سطح بلند ہو رہی ہے۔ دنیا کے کئی ساحلی شہر جو پہلے محفوظ سمجھے جاتے تھے، اب سمندری پانی کے چڑھاو¿ کی زد میں ہیں۔ اس کے علاوہ، درجہ حرارت میں اضافے نے دنیا بھر کے موسموں میں شدت پیدا کی ہے۔ کہیں خشک سالی نے فصلوں کو تباہ کیا ہے تو کہیں بے وقت بارشوں اور طوفانوں نے انسانی بستیوں کو نیست و نابود کر دیا ہے۔ اس ماحولیاتی عدم توازن کی وجہ سے دنیا کے ایک حصے میں طویل خشک سالی سے قحط کے مناظر ہیں تو دوسرے حصے میں غیر متوقع، بے وقت اور شدید بارشوں اور طوفانوں نے ہنستی بستی انسانی آبادیوں کو ملبے کے ڈھیر میں تبدیل کر دیا ہے۔ خاص طور پر جنوبی ایشیا کا خطہ، جو پہلے ہی گنجان آباد ہے، مون سون کے بدلتے اور بے لگام ہوتے نظام کے باعث شدید عدم تحفظ کا شکار ہو چکا ہے اور پاکستان جیسے زرعی ملک کے لیے یہ ایک سنگین خطرہ بنتا جا رہا ہے۔
پاکستان میں گلوبل وارمنگ کے اثرات کئی سطحوں پر محسوس کیے جا رہے ہیں۔ سب سے زیادہ متاثر ہونے والے علاقوں میں شمالی علاقہ جات شامل ہیں، جہاں کے گلیشیئر تیزی سے ختم ہو رہے ہیں۔ گلگت بلتستان اور چترال جیسے علاقوں میں گلیشیئرز کا پگھلاو¿ نہ صرف پانی کے ذخائر کے لیے خطرہ ہے بلکہ اچانک آنے والی گلیشئر لیک آو¿ٹ فلڈز (GLOFs) سے جانی و مالی نقصان کا اندیشہ بھی بڑھ چکا ہے۔ ان علاقوں میں زمین کھسکنے کے واقعات میں بھی اضافہ دیکھا جا رہا ہے، جو انسانی زندگی کے ساتھ ساتھ انفراسٹرکچر کے لیے بھی شدید خطرہ بن چکے ہیں۔میدانی علاقوں میں گرمی کی شدت میں اضافہ ہوا ہے اور اب وہ درجہ حرارت جو پہلے کبھی کبھار دیکھا جاتا تھا، ہر سال کا معمول بن چکا ہے۔ پنجاب، سندھ اور بلوچستان کے مختلف شہروں میں جون اور جولائی کے مہینوں میں درجہ حرارت 50 ڈگری سینٹی گریڈ سے تجاوز کر چکا ہے، جس نے نہ صرف انسانی صحت بلکہ مویشیوں، فصلوں اور قدرتی نظام حیات پر بھی گہرے اثرات ڈالے ہیں۔ ہیٹ ویو اب ایک معمول بن چکی ہے اور اس کے باعث ہسپتالوں پر بوجھ، بجلی کے نظام پر دباو¿ اور پانی کی طلب میں بے تحاشا اضافہ ہو چکا ہے۔
زراعت، جو پاکستان کی معیشت کا ستون ہے، گلوبل وارمنگ کے باعث شدید متاثر ہو رہی ہے۔ فصلوں کے اگنے کے اوقات بدل رہے ہیں، پانی کی قلت بڑھ رہی ہے، اور زمین کی زرخیزی میں کمی واقع ہو رہی ہے۔ گندم، کپاس، چاول اور گنا جیسی فصلیں یا تو وقت پر تیار نہیں ہوتیں یا ان کی پیداوار میں واضح کمی دیکھنے میں آتی ہے۔ اس کے نتیجے میں خوراک کی قلت اور قیمتوں میں اضافہ ایک نیا بحران پیدا کر رہا ہے۔ کسان جن روایتی طریقوں پر انحصار کرتے تھے، اب ان پر اعتبار نہیں رہا، اور انہیں بدلتے ہوئے موسموں کے ساتھ خود کو ہم آہنگ کرنے کی شدید ضرورت ہے۔پاکستان میں توانائی کا انحصار بھی ایسے ذرائع پر ہے جو گلوبل وارمنگ کے ذمہ دار ہیں۔ کوئلے سے چلنے والے بجلی گھر، گاڑیوں سے نکلنے والا دھواں، اور غیر منظم صنعتی اخراج ہمارے ماحولیاتی مسائل کو مزید گھمبیر بنا رہے ہیں۔ ماحول دوست توانائی ذرائع، جیسے شمسی، ہوا اور پانی سے بجلی کی پیداوار پر توجہ ناکافی ہے۔ حکومتی سطح پر پالیسیاں تو موجود ہیں لیکن ان پر عملدرآمد کی رفتار، شفافیت اور تسلسل مطلوبہ معیار سے بہت کم ہے۔عوامی شعور کی کمی بھی ایک بڑا مسئلہ ہے۔ گلوبل وارمنگ کو صرف سائنسی یا بین الاقوامی مسئلہ سمجھ کر نظر انداز کیا جاتا ہے حالانکہ اس کے اثرات براہ راست ہر پاکستانی شہری کی زندگی پر پڑ رہے ہیں۔ تعلیمی اداروں، میڈیا، اور سماجی پلیٹ فارمز کو چاہیے کہ وہ اس معاملے کو مسلسل اجاگر کریں تاکہ ایک عام شہری بھی یہ سمجھ سکے کہ اس کا طرزِ زندگی کس طرح ماحول پر اثر انداز ہو رہا ہے اور وہ کن اقدامات سے بہتری لا سکتا ہے۔