آزاد کشمیر کی سیاسی قیادت کا جے اے اے سی کے خلاف بڑا فیصلہ؛ احتجاجی بیانیہ مسترد، اپوزیشن بھی حکومت کے ساتھ کھڑی ہو گئی

مظفرآباد: آزاد کشمیر کی حکومت اور حزبِ اختلاف (اپوزیشن) سمیت تمام سیاسی قیادت نے جوائنٹ عوامی ایکشن کمیٹی (JAAC) کے احتجاجی بیانیے کو یکسر مسترد کرتے ہوئے اسے بے بنیاد اور گمراہ کن قرار دے دیا ہے۔
مشترکہ اعلامیے اور حکومتی مؤقف کے مطابق، عوامی مسائل کے نام پر ریاست میں منفی بیانیہ پھیلانے کی کوشش کی جا رہی ہے، لیکن اب اصل حقائق عوام کے سامنے آ چکے ہیں اور جے اے اے سی کی ہٹ دھرمی بے نقاب ہو گئی ہے۔
 آزاد کشمیر کی حکومت اور اپوزیشن جے اے اے سی کی احتجاجی اور دباؤ کی سیاست کے خلاف مکمل طور پر متحد ہیں۔ حکومت کا کہنا ہے کہ انہوں نے مسائل کے حل کے لیے ہمیشہ مذاکرات، عوام کو ریلیف دینے اور معاہدوں پر عمل درآمد کا راستہ اختیار کیا۔
 سیاسی قیادت کے مطابق، عوامی ایکشن کمیٹی نے حکومت کی طرف سے دی جانے والی رعایتوں اور لچک کا فائدہ اٹھانے کے بجائے سڑکوں کی سیاست اور دباؤ کی حکمتِ عملی کو ترجیح دی، جسے اب مزید قبول نہیں کیا جائے گا۔