یوٹیوب نے مفت صارفین کے لیے بیک گراؤنڈ پلے بیک فیچر تک رسائی محدود کر دی

کیلیفورنیا : یوٹیوب کی جانب سے کوششیں جاری ہیں کہ مفت استعمال کرنے والے صارفین کو پریمیئم سبسکرپشن کی جانب راغب کیا جائے۔ اس کے تحت، کمپنی نے یوٹیوب کے ایک مقبول فیچر، بیک گراؤنڈ پلے بیک، کو مفت صارفین کے لیے بند کرنے کا فیصلہ کیا ہے۔

ایک رپورٹ کے مطابق، یوٹیوب نے اب موبائل براؤزرز پر بیک گراؤنڈ پلے بیک فیچر کو مفت صارفین سے ختم کرنے کے لیے اقدامات شروع کر دیے ہیں۔ یہ فیچر پہلے گوگل کروم میں صرف پریمیئم صارفین کے لیے دستیاب تھا، لیکن کافی عرصے سے مفت صارفین دوسرے موبائل براؤزرز جیسے مائیکرو سافٹ ایج، بریو اور سام سنگ انٹرنیٹ کے ذریعے اس فیچر کا استعمال کر رہے تھے۔

اب کئی صارفین نے شکایت کی ہے کہ یہ فیچر اب ان کے لیے کام نہیں کر رہا، اور گوگل نے اس پر کارروائی کرنے کا عندیہ دیا ہے۔ کچھ صارفین ابھی بھی اس فیچر کو استعمال کر پا رہے ہیں، لیکن آنے والے دنوں میں یہ فیچر ان کے لیے بھی دستیاب نہیں ہوگا۔

یوٹیوب کی اس پالیسی پر صارفین کی جانب سے تنقید کے بعد گوگل نے ایک بیان جاری کیا، جس میں کہا گیا کہ یہ فیچر صرف یوٹیوب پریمیئم کے لیے ڈیزائن کیا گیا تھا، مگر مفت صارفین موبائل براؤزرز کے ذریعے اس تک رسائی حاصل کر رہے تھے۔ اس مسئلے کی روک تھام کے لیے اقدامات کیے جا رہے ہیں۔