دوسرا ٹیسٹ: پاکستان نے پہلی اننگز میں 387 رنز بنا کر ویسٹ انڈیز پر 43 رنز کی سبقت حاصل کرلی

پورٹ آف اسپین: پاکستان نے ویسٹ انڈیز کے خلاف جاری دوسرے ٹیسٹ میچ کی پہلی اننگز 387 رنز پر ختم کرتے ہوئے میزبان ٹیم کے خلاف 43 رنز کی اہم برتری حاصل کرلی۔

تیسرے روز پاکستان نے 266 رنز پر دو وکٹوں کے نقصان سے اپنی اننگز کا دوبارہ آغاز کیا۔ عبداللہ شفیق اور کپتان بابر اعظم نے سکور کو آگے بڑھانے کی کوشش کی، تاہم ان کی شراکت زیادہ دیر قائم نہ رہ سکی۔ بابر اعظم 88 رنز کی عمدہ اننگز کھیلنے کے بعد پویلین واپس لوٹے۔ انہوں نے 147 گیندوں کا سامنا کیا، 10 چوکے اور ایک چھکا لگایا، لیکن سنچری سے صرف 12 رنز کی دوری پر آؤٹ ہوگئے۔

کپتان کی وکٹ گرنے کے فوراً بعد پاکستان کو مزید دو نقصانات بھی اٹھانا پڑے اور چند ہی گیندوں میں بیٹنگ لائن دباؤ میں آگئی۔

بعد ازاں محمد رضوان نے عبداللہ شفیق کے ساتھ مل کر اننگز کو سنبھالا۔ دونوں نے 25 رنز کا اضافہ کیا اور ٹیم کا مجموعہ 300 کے ہندسے سے آگے پہنچایا، تاہم رضوان 18 رنز بنانے کے بعد جومیل واریکن کی گیند پر بولڈ ہوگئے۔

رضوان کے آؤٹ ہونے کے بعد عبداللہ شفیق نے ساجد خان کے ہمراہ ذمہ دارانہ کھیل پیش کیا۔ دونوں کے درمیان 59 رنز کی شراکت قائم ہوئی۔ ساجد خان 30 رنز بنا کر آؤٹ ہوئے، جبکہ علی عثمان 10 رنز بنا سکے۔ عبید شاہ اور محمد علی کھاتہ کھولے بغیر آؤٹ ہوگئے۔

عبداللہ شفیق ایک شاندار اننگز کھیلتے ہوئے 323 گیندوں پر ناقابل شکست 160 رنز کے ساتھ کریز پر موجود رہے اور پاکستان کو 387 رنز تک پہنچانے میں مرکزی کردار ادا کیا۔ اس سکور کے نتیجے میں قومی ٹیم نے ویسٹ انڈیز کی پہلی اننگز کے مقابلے میں 43 رنز کی برتری حاصل کرلی۔

یاد رہے کہ ویسٹ انڈیز نے ٹاس جیتنے کے بعد پہلے بیٹنگ کا فیصلہ کیا تھا اور اپنی پہلی اننگز میں 344 رنز بنائے تھے۔

پاکستان کی جانب سے باؤلنگ میں ساجد خان سب سے کامیاب رہے اور چار کھلاڑیوں کو آؤٹ کیا، جبکہ عبید شاہ، محمد علی اور علی عثمان نے دو، دو وکٹیں حاصل کیں۔

واضح رہے کہ دو میچوں پر مشتمل سیریز کے پہلے ٹیسٹ میں ویسٹ انڈیز نے کامیابی حاصل کرکے 0-1 کی برتری اپنے نام کر رکھی ہے۔