بنگلہ دیش میں انتخابات فروری 2026 میں ہوں گے: یونس

ڈھاکہ : بنگلہ دیش کے عبوری وزیر اعظم محمد یونس نے منگل کو اعلان کیا کہ ملک میں اگلے عام انتخابات فروری 2026 میں منعقد کیے جائیں گے۔ یہ ملک میں گزشتہ سال ہونے والی عوامی تحریک کے بعد پہلا انتخاب ہوگا جس میں وزیراعظم شیخ حسینہ کی حکومت ختم ہوئی تھی۔

یونس نے کہا کہ وہ چیف الیکشن کمشنر کو ایک درخواست ارسال کریں گے تاکہ انتخابات رمضان المبارک سے قبل کرائے جائیں۔ اس سے قبل انتخابات اپریل میں متوقع تھے، تاہم اہم سیاسی جماعتوں نے انتخابات جلد کرانے کی شدید خواہش کا اظہار کیا تھا۔

انہوں نے خطاب میں کہا کہ اب ہم اس اہم مرحلے میں داخل ہو رہے ہیں جہاں عبوری حکومت منتخب حکومت کو پرامن انداز میں اقتدار منتقل کرے گی۔ انہوں نے عوام سے دعا اور تعاون کی اپیل کی تاکہ انتخابات شفاف، آزاد اور خوشگوار ماحول میں ہوں۔