روس نے طالبان حکومت کو تسلیم کر لیا، افغانستان کے نئے سفیر کی اسناد قبول

کابل : روس افغانستان میں طالبان کی حکومت کو تسلیم کرنے والا پہلا ملک بن گیا ہے۔ روس نے افغانستان کے نئے سفیر کی اسناد باضابطہ طور پر قبول کر لی ہیں۔ روسی سفیر دیمتری ژیرنوف نے کابل میں افغان وزیر خارجہ مولوی امیر خان متقی سے ملاقات کی اور افغانستان کی امارت اسلامیہ کو تسلیم کرنے کا روس کا فیصلہ پہنچایا۔

افغان وزارت خارجہ کے مطابق، روسی سفیر نے اس فیصلے کو افغانستان اور روس کے تعلقات کو مضبوط کرنے کے لیے ایک تاریخی قدم قرار دیا۔ افغان وزیر خارجہ نے اس فیصلے کا خیرمقدم کرتے ہوئے کہا کہ یہ دونوں ممالک کے درمیان مثبت تعلقات اور تعمیری تعاون کا نیا آغاز ہے۔

یاد رہے کہ 2021 میں طالبان کے اقتدار میں آنے کے بعد بین الاقوامی برادری نے انہیں باضابطہ طور پر تسلیم نہیں کیا تھا، کیونکہ طالبان حکومت نے خواتین کے حقوق سمیت شہریوں کے بنیادی حقوق پر پابندیاں عائد کی تھیں۔ تاہم، چین اور روس نے طالبان کے ساتھ محدود سفارتی تعلقات کو فروغ دینے کا عندیہ دیا تھا، اور روس نے اس سال اپریل میں طالبان کو دہشت گرد تنظیموں کی فہرست سے نکال بھی دیا تھا۔