اسرائیلی سابق سیکیورٹی افسران کا ٹرمپ سے غزہ میں جنگ بندی کا مطالبہ

تل ابیب  :  اسرائیل کے 600 سے زیادہ سابق اعلیٰ فوجی اور سیکیورٹی حکام نے امریکی صدر ڈونلڈ ٹرمپ سے اپیل کی ہے کہ وہ غزہ میں جنگ بند کروانے کے لیے اسرائیلی حکومت پر دباؤ ڈالیں۔ ان کا کہنا ہے کہ اب وقت آ گیا ہے کہ صدر ٹرمپ اس معاملے میں وہی کردار ادا کریں جو انہوں نے لبنان کے معاملے میں ادا کیا تھا۔

یہ اپیل ایک خط کی صورت میں سامنے آئی ہے جسے "کمانڈرز فار اسرائیل سیکیورٹی" نامی تنظیم نے لکھا ہے، جس میں سابق فوجی، جنرل، انٹیلیجنس حکام اور دیگر اعلیٰ سیکیورٹی اہلکار شامل ہیں۔

خط میں کہا گیا ہے کہ اسرائیلی فوج حماس کے عسکری ڈھانچے کو کافی حد تک تباہ کر چکی ہے، اور اب صرف یرغمالیوں کی واپسی کا مسئلہ رہ گیا ہے، جو صرف مذاکرات کے ذریعے ممکن ہے۔ ان کا ماننا ہے کہ اب حماس اسرائیل کے لیے کوئی بڑا خطرہ نہیں رہی۔

انہوں نے تجویز دی ہے کہ ایک عالمی اور علاقائی اتحاد قائم کیا جائے جو غزہ کو حماس کے بجائے ایک نئی قیادت کی طرف لے جائے، اور یہ قیادت اصلاح شدہ فلسطینی اتھارٹی کے زیرِ انتظام ہو۔

ان سابق حکام کے مطابق جنگ کو طول دینا نہ صرف انسانی بحران کو بڑھا رہا ہے بلکہ اسرائیل کی عالمی ساکھ کو بھی نقصان پہنچا رہا ہے، اس لیے صدر ٹرمپ کو فوری کردار ادا کرنا چاہیے۔