سنیپ چیٹ نے مفت اسٹوریج ختم کرنے کا اعلان کر دیا، صارفین کو اب پرانی تصاویر اور ویڈیوز محفوظ رکھنے کے لیے ادائیگی کرنی ہوگی

کیلیفورنیا : انسٹنٹ میسیجنگ ایپ سنیپ چیٹ نے اعلان کیا ہے کہ اب صارفین کو اپنی پرانی تصاویر اور ویڈیوز اسٹور کرنے کے لیے فیس دینی پڑے گی۔ کمپنی کا کہنا ہے کہ وہ صارفین جن کے پاس 5 جی بی سے کم ڈیٹا ہے، انہیں کوئی فرق محسوس نہیں ہوگا، مگر جو 5 جی بی سے زیادہ ڈیٹا رکھتے ہیں، انہیں اپنی یادیں محفوظ رکھنے کے لیے ادائیگی کرنا ہوگی۔

اب تک صارفین نے سنیپ چیٹ پر ایک کھرب سے زائد تصاویر اور ویڈیوز محفوظ کی ہیں، اور اب اس ڈیٹا کے لیے کمپنی نے نئے اسٹوریج پلان متعارف کرائے ہیں۔ ان میں 100 جی بی کی اسٹوریج کے لیے ماہانہ تقریباً 2.99 آسٹریلین ڈالر فیس مقرر کی گئی ہے، جبکہ زیادہ اسٹوریج کے لیے دوسرے پیکجز بھی دستیاب ہوں گے۔

سنیپ چیٹ نے کہا ہے کہ وہ 5 جی بی سے زائد ڈیٹا رکھنے والے صارفین کو 12 ماہ کی عارضی اسٹوریج دیں گے تاکہ وہ فیصلہ کر سکیں کہ اسٹوریج اپ گریڈ کریں یا کچھ یادیں ڈیلیٹ کریں۔

یہ تبدیلی دنیا بھر میں آہستہ آہستہ نافذ کی جائے گی، اور برطانیہ میں اس کا آغاز ہو چکا ہے، لیکن کمپنی نے قیمتوں کی تفصیلات ابھی تک شیئر نہیں کی ہیں۔

سوشل میڈیا پر صارفین کا اس فیصلے پر ردعمل منفی ہے اور کئی لوگوں نے کہا ہے کہ اگر انہیں ادائیگی کرنی پڑی تو وہ سنیپ چیٹ کا استعمال چھوڑ دیں گے۔