پی ایس ایل 11 میں نئی فرنچائز: ملتان سلطانز کی شناخت مضبوط

لاہور: پاکستان سپر لیگ (پی ایس ایل) سیزن 11 میں شامل فرنچائز سیالکوٹ اسٹالینز کو اب باضابطہ طور پر ملتان سلطانز کے نام سے ری برانڈ کر دیا گیا ہے۔ یہ تبدیلی منگل کو پی ایس ایل کے چیف ایگزیکٹو سلمان نصیر نے تصدیق کی۔

یہ اعلان ایک مشترکہ پریس کانفرنس کے دوران کیا گیا، جس میں فرنچائز کے مالک حمزہ مجید اور سی ڈی وینچرز کے سربراہ گوہر شاہ بھی موجود تھے۔

اسلام آباد میں ہونے والی ٹیم نیلامی کے دوران او زیڈ ڈیولپرز نے سیالکوٹ اسٹالینز کی فرنچائز 10 سال کے لیے 18.5 ارب روپے میں حاصل کی تھی، لیکن اب کمپنی نے سی ڈی وینچرز کے ساتھ شراکت داری قائم کر لی ہے۔ اس نئے انتظام کے تحت گوہر شاہ کو فرنچائز کا چیف ایگزیکٹو آفیسر مقرر کیا گیا اور ٹیم کا نام ملتان سلطانز رکھا گیا۔

پی ایس ایل کے چیف ایگزیکٹو سلمان نصیر کے مطابق اس تازہ قدم کے بعد فرنچائز کی سالانہ قیمت 2 ارب روپے تک بڑھ گئی ہے۔ انہوں نے بتایا کہ نئے CEO گوہر شاہ نے ٹیم کے نام کی تبدیلی کی درخواست دی تھی، جسے منظوری مل گئی۔

گزشتہ کچھ ہفتوں میں سیالکوٹ اسٹالینز کے حوالے سے افواہیں گردش کرتی رہیں، جن میں او زیڈ ڈیولپرز کے حصص بیچنے اور مالی مشکلات کے دعوے شامل تھے۔

پریس کانفرنس میں گوہر شاہ نے واضح کیا کہ وہ باضابطہ طور پر فرنچائز کے CEO بن گئے ہیں اور ان کا مقصد جنوبی پنجاب کی نمائندگی کو لیگ میں مضبوط بنانا ہے۔

انہوں نے کہا: “اکیلا اسٹالین پی ایس ایل نہیں جیت سکتا، آگے بڑھنے کے لیے اسٹالین کو سلطان کی ضرورت ہے، اور ہم سلطان کے طور پر آئے ہیں۔ ملتان کی پہچان کو برقرار رکھنا ہمارے لیے نہایت اہم ہے۔”

یاد رہے کہ پاکستان سپر لیگ سیزن 11 کا آغاز 26 مارچ سے 3 مئی 2026 تک ہوگا۔