ملک بھر میں مون سون کی بارشیں جاری، نشیبی علاقوں میں سیلاب اور لینڈ سلائیڈنگ کا خطرہ

لاہور : پاکستان کے مختلف حصوں میں مون سون بارشوں کا نیا سلسلہ زور پکڑ چکا ہے جس کے باعث پنجاب، خیبرپختونخوا اور بلوچستان کے کئی اضلاع متاثر ہو رہے ہیں۔ محکمہ موسمیات نے بتایا ہے کہ یہ بارشیں 5 سے 8 جولائی تک جاری رہنے کا امکان ہے، جبکہ بعض علاقوں میں 10 جولائی تک بھی بارشیں ہو سکتی ہیں۔

پنجاب میں بارشوں کا دائرہ بہت وسیع ہے۔ راولپنڈی، مری، گلیات، لاہور، گوجرانوالہ، سیالکوٹ، فیصل آباد، سرگودھا، میانوالی، بھکر، جھنگ، ساہیوال، اوکاڑہ، قصور اور کئی دیگر علاقوں میں شدید بارشیں متوقع ہیں۔ محکمہ موسمیات نے خبردار کیا ہے کہ بعض مقامات پر گرج چمک کے ساتھ موسلا دھار بارش ہو سکتی ہے۔

پی ڈی ایم اے کے مطابق 7 جولائی سے دریاؤں میں پانی کی سطح میں اضافے کا امکان ہے، جس کے باعث ندی نالوں، برساتی پانی کے راستوں اور نشیبی علاقوں میں سیلابی صورتحال پیدا ہو سکتی ہے۔ شہری علاقوں میں اربن فلڈنگ یعنی بارش کا پانی سڑکوں پر جمع ہونے کا بھی خدشہ ہے۔

خیبرپختونخوا کے کئی اضلاع جیسے سوات، دیر، شانگلہ، کوہستان، مانسہرہ، پشاور، مردان اور لکی مروت میں بھی بارشوں کا سلسلہ جاری ہے۔ بعض پہاڑی علاقوں میں لینڈ سلائیڈنگ کا خطرہ ہے جبکہ مقامی ندی نالوں میں طغیانی آنے کی پیش گوئی کی گئی ہے۔

بلوچستان کے کچھ اضلاع میں موسم گرم اور مرطوب رہے گا، لیکن بارکھان، سبی، لورالائی، ژوب، خضدار، قلات اور مستونگ میں گرج چمک کے ساتھ بارش کا امکان ہے۔

تمام ضلعی انتظامیہ اور ریسکیو اداروں کو الرٹ کر دیا گیا ہے۔ عوام سے اپیل کی گئی ہے کہ خراب موسم کے دوران غیر ضروری سفر سے گریز کریں، ندی نالوں کے قریب نہ جائیں اور کسی بھی ہنگامی صورتحال میں فوری طور پر مقامی حکام یا ریسکیو ٹیموں سے رابطہ کریں۔